Арганізатар "групы Ханжанкова" (1962-1963 гг.), якая мела на мэце падарваць радыёглушыльную вежу ў Менску, вязень сталінскіх лягераў. Нарадзіўся 13 сакавіка 1942 году ў пасёлку Усьць-Уціны Магаданскай вобласьці ў сям'і былых палітзьняволеных (бацька быў асуджаны ў 1935-м, дзед па матчынай лініі - у 1929-м). У 1955-м сям’і дазволілі вярнуцца ў Менск. З 1959-га Сяргей Ханжанкоў – студэнт гідратэхнічнага факультэту Беларускага палітэхнічнага інстытуту. 27 траўня 1963 году яго і ягоных сяброў арыштавалі савецкія спэцворганы. 7 кастрычніка таго ж году засуджаны за “спробу зрабіць дывэрсію” і “антысавецкую агітацыю і прапаганду” да 10 гадоў лягераў. Пасьля вызваленьня ў 1973-м вярнуўся ў Менск. Працаваў інжынэрам у Беларускім дзяржаўным інстытуце праектаваньня аўтадарог, на заводзе імя Кірава. З 2002-га на пэнсіі. Удзельнік I-га з’езду палітзьняволеных (жнівень 1990-га, Санкт-Пецярбург). Не рэабілітаваны і рэабілітацыі ніколі не дамагаўся.
Што для вас свабода?
Я ў ёй жыву.
Што найбольш абмяжоўвае вашу свабоду?
Нішто.
Што для вас шчасьце?
Маё рэальнае жыцьцё.
Чаго вы найбольш баіцеся?
Баяцца.
Які талент вы хацелі б мець?
Няма нічога такога.
Кім з сучасьнікаў вы захапляецеся?
Тым, хто актуальны.
Што вы найбольш любіце рабіць?
Чытаць, слухаць, спасьцігаць.
Калі б можна было пражыць жыцьцё яшчэ раз, што б вы зьмянілі?
Адзеньне.
Якую найлепшую параду вы атрымалі?
Не было такой.
Які ваш улюбёны дэвіз?
Канкрэтнага няма, хаця люблю і цытую шмат якія.
У якой палітычнай сыстэме вы хацелі б жыць?
У дэмакратычнай.
У якой краіне вы хацелі б жыць?
У сваёй.
У якую эпоху вы хацелі б жыць?
У сучасную.
Калі б вы сталі кіраўніком Беларусі, што б зрабілі найперш?
Падаў бы ў адстаўку.
Якія адносіны Беларусь павінна мець з Эўразьвязам?
Вучня і настаўніка.
Якія адносіны Беларусь павінна мець з Расеяй?
Добрасуседзкія.
Некаторыя думаюць так: “Хай дыктатура, абы свая”. А Вы?
Ні ў якім разе!
Калі і як у Беларусі зьменіцца ўлада?
Калі народ сасьпее, каб адбылося гэта дэмакратычным шляхам.
Калі беларусы загавораць па-беларуску?
Калі яны гэтага захочуць.
Што будзе, калі беларусы не загавораць па-беларуску?
Будуць гаварыць па-ангельску альбо па-расейску.