Высокі беларускі госьць тады прыбыў у альпійскую рэспубліку на запрашэньне тагачаснага старшыні аўстрыйскага НАК і ўладальніка сеткі Casinos Austria Лео Вальнэра. Візыт “прэзыдэнта-ізгоя”, паводле Эрвіна Рота, выглядаў на дзіва ціхім, нават таемным, пра яго амаль нічога не пісала мясцовая прэса:

“Гэта было пэўным трукам, – кажа Эрвін Рот. – Атрымалася, што адзін алімпійскі кіраўнік запрасіў іншага. Аднак у рэальнасьці Алімпійскі камітэт Аўстрыі ня меў ніякага дачыненьня да візыту Лукашэнкі. З гэтай паездкай ня быў зьвязаны ніводзін прадстаўнік НАК. Аніводзін прадстаўнік Алімпійскага камітэту не сустракаўся з гэтай дэлегацыяй. Толькі Вальнэр”.
Паводле Эрвіна Рота, падзеі 8-гадовай даўнасьці зацікавілі яго пасьля таго, як у аўстрыйскай прэсе зьявілася інфармацыя ўжо пра экс-старшыню Нацыянальнага алімпійскага камітэту Вальнэра і пра брудныя грошы, якія праходзілі праз гэтую арганізацыю. Два тыдні таму ў штотыднёвіку "Format" Рот убачыў дадзеныя “нібыта незалежнай аўдытарскай праверкі”, праведзенай у Алімпійскім камітэце. Зь іх вынікала, што Лео Вальнэр нібыта нічога ня ведаў пра так званую “чорную бухгальтэрыю”. Адразу пасьля гэтага Рот пачаў уласнае расьсьледаваньне. У аўстрыйскім друку за 2002 год ён знайшоў невялікую інфармацыю, зьвязаную зь імем Вальнэра і канікуламі Лукашэнкі ў Аўстрыі.

“Я прааналізаваў, дзе магла б адпачываць беларуская дэлегацыя. Мой маршрут быў у тырольскія гарналыжныя курорты. Я апынуўся ў такой мясцовасьці, як Зэефэльд. Далей было проста. У Зэефельдзе ўсяго пару пяцізоркавых гатэляў, бо, зразумела, прэзыдэнт мог спыніцца толькі ў такім. Я гутарыў з пэрсаналам гатэлю Klosterbrau. На маю просьбу яны знайшлі гасьцявую кнігу, дзе былі запісаныя імёны наведнікаў”.

Эрвіну Роту, паводле ягоных слоў, вельмі пашанцавала: праз 8 гадоў захаваліся ўсе фінансавыя дакумэнты таго адпачынку агулам на 200 тысяч эўра. Афіцыйна яны выпісваліся на НАК Аўстрыі, аднак абышлі афіцыйную бухгальтэрыю.

На квітках, якія знаходзяцца ў “чырвонай тэчцы” журналіста, стаіць імя Аляксандра Лукашэнкі, ягоных сыноў, іншых набліжаных асобаў, а таксама назвы фірмаў, гатэляў, авіякампаніі (чартэрны рэйс Вена – Інсбрук), верталётнай кампаніі (гэтыя паслугі спатрэбіліся прэзыдэнту пасьля атрыманай траўмы, калі яго з горнага схілу даставілі ў прыватную мэдычную практыку), ганарарныя чэкі за мэдычныя паслугі, аплата за гарналыжныя ўрокі для 11 прадстаўнікоў беларускай дэлегацыі, рахунак на арэнду аўтобуса для 34 чалавек. Кожная паперка – свайго роду ілюстрацыя альпійскіх канікулаў вялікай беларускай каманды.

Побач з гатэлямі ў Зэефэльдзе знаходзіцца і казіно Лео Вальнэра. Прадстаўнікі беларускай каманды наведвалі і яго.

“Я дакладна ведаю, што прэзыдэнт наведваў казіно і гуляў там. Зразумела, мы ўсе ведаем, што казіно – ня самае няправільнае месца для пазбаўленьня ад брудных грошай, аднак упэўнены, што ў гэтым выпадку нічога такога не было”.

Эрвін Рот падкрэсьлівае, што ён разглядае ўсю гэтую гісторыю найперш як аўстрыйскі скандал. Людзі, якія беспасярэдне арганізоўвалі адпачынак для беларускага прэзыдэнта з Casinos Austria, прадстаўляюць адкрытую для ўсіх арганізацыю. Чаму ў выпадку з Лукашэнкам усё праходзіла праз “чорную бухгальтэрыю”? Ці было гэта выклікана прасоўваньнем некаторых бізнэс-інтарэсаў на беларускім рынку? Чыіх менавіта? Адказы на гэтыя пытаньні Эрвін Рот спадзяецца знайсьці праз новае расьсьледаваньне.

Цяпер жа відавочна, што ў выніку гэтай гісторыі заплямленыя аказаліся і бізнэсоўцы, і алімпійцы, і замежныя палітыкі, лічыць журналіст.

З “чырвонай тэчкі” Эрвіна Рота (спэцыяльна для "Свабоды")

_{Рахункі за пералёт Лукашэнкі на верталёце і за аказаныя яму мэдычныя паслугі}


Гатэль Klosterbräu








Паводле гатэльных мэнэджараў, у пяцізоркавым Klosterbräu Лукашэнка пакінуў свой удзячны водгук.