З 1200 найменьняў малочнай прадукцыі, якая пастаўлялася ў Расею да пачатку малочнай вайны, толькі 624 прайшлі перарэгістрацыю “Роспотребнадзора”. Пакуль ня ўсе беларускія прадпрыемствы аднавілі пастаўкі малочнай прадукцыі на расейскі рынак.
СЛУХАЦЬ:
Намесьнік міністра сельскай гаспадаркі Беларусі Міхаіл Савельеў падвёў вынікі працы “Роспотребнадзора”:
“Роспотребнадзору” я магу толькі падзякаваць за добрую працу і дакладную арганізацыю працы іх лябараторый, калі мы пастаўлялі пробы. І за тое, што ў кароткі тэрмін яны маглі іх дасьледаваць і пасьпелі выдаць дакумэнты, ім можна толькі паставіць “дзесяць” па дзесяцібальнай шкале”.
“Роспотребнадзору” я магу толькі падзякаваць за добрую працу і дакладную арганізацыю працы іх лябараторый, калі мы пастаўлялі пробы
“Уся прадукцыя, якая вырабляецца ў Рэспубліцы Беларусь і якую вытворцы жадаюць паставіць на расейскі рынак, мае ўсе неабходныя дакумэнты, выдадзеныя “Роспотребнадзорам”, і сэртыфікаты пад іх у поўным аб’ёме. У нас усе атрымалі, і гэта больш за 600 санэпідэмзаключэньняў. Уся прадукцыя, згодна з нашай дамоўленасьцю, перарэгістраваная”.
Аднак казаць, што ўсе беларускія вытворцы атрымалі магчымасьць пастаўляць сваю прадукцыю на расейскі рынак, пакуль зарана.
У Менску “Гарадзкі малочны завод № 1” пакуль не аднавіў паставак малочнай прадукцыі ў Расею. Намесьнік дырэктара Іван Сярмяжка паведаміў, што яшчэ ня ўсе дазволы, неабходныя для паставак прадукцыі, атрыманыя:
“Па пастаўках пэўныя пытаньні ёсьць. Тут вырашаюцца пытаньні антыбіётыкаў. Вырашыцца пытаньне, і ня будзе ніякіх праблем”.
Карэспандэнт: “Дык вы зараз не пастаўляеце прадукцыю ў Расею?”
Сярмяжка: “Часова не”.
Карэспандэнт: “А да якога часу гэта працягнецца?”
Сярмяжка: “Ня ведаю. Гэта чыста пытаньні абодвух бакоў. Вырашаем свае пытаньні і пачынаем пастаўляць”.
Камэнтуючы сытуацыю, намесьнік міністра сельскай гаспадаркі Беларусі Міхаіл Савельеў сказаў:
“Вы ня блытайце, калі ласка, дакумэнты “Роспотребнадзора” і тое, што ў прадукцыі “Россельхознадзор” на першым заводзе знайшоў антыбіётыкі. Калі знайшоў, то завод вазіць ня будзе, пакуль іх там ня будзе. Гэта наагул дзьве розныя тэмы. Гармалзаводу трэба займацца сыравіннай зонай. І глядзець, каб у яго малако паступала з колькасьцю антыбіётыкаў, якая прадугледжана санэпідэмнаглядам”.
Паводле спадара Савельева, цяпер шэсьць беларускіх прадпрыемстваў маюць праблемы з “Россельхознадзорам” па антыбіётыках. У “Роспотребнадзоры” пакуль не падвялі вынікаў працы ў беларускім кірунку.
Дык ці скончылася малочная вайна? На гэта Анатоль Гуляеў, экспэрт у аграрнай галіне, сказаў:
“Гэтая вайна ня скончылася і ў найбліжэйшы час ня скончыцца. І малако, і антыбіётыкі, і мяса — гэта толькі зброя для дасягненьня нейкіх мэтаў.
А зброя калі пайшла ў ход, то павінна нешта рабіць. І я ня думаю, што ў бліжэйшы час яна будзе схаваная. У бліжэйшым часе будуць нейкія іншыя канфлікты”.