Сяргей Панамароў атрымаў падтрымку ў пракуратуры Клецкага раёну паводле сваёй скаргі на надуманы перасьлед з боку мясцовых міліцыянтаў.
Рэгіянальны каардынатар руху “За свабоду” Сяргей Панамароў атрымаў падтрымку ў пракуратуры Клецкага раёну паводле сваёй скаргі на надуманы перасьлед з боку мясцовых міліцыянтаў.
Са словаў заяўніка, яго дакумэнты прыняла да разгляду старшы памочнік пракурора Вольга Салавей.
— Справа тычыцца падзеяў 7 сьнежня, — удакладняе Сяргей Панамароў. — У той дзень на загад чыноўнікаў Клецкага райвыканкаму міліцыянты забаранілі сустрэчу грамадзкасьці са старшынём Беларускага таварыства аховы помнікаў гісторыі і культуры Антонам Астаповічам. Міліцыянты, якімі кіравалі начальнікі аддзелаў Клецкага РАЎС Пляшэвіч і Масько, літаральна пад прымусам выпхнулі людзей за дзьверы раённага Палацу культуры.
Са словаў заяўніка, ад мінулай нядзелі да сёньня яму штодзённа тэлефануе лейтэнант міліцыі Аляксандар Лямбіеўскі і з пагрозамі выклікае на сустрэчу. Матывацыя міліцыянта: актывіст Панамароў арганізаваў 7 сьнежня несанкцыянаваны мітынг грамадзкасьці.
— Я вымушаны зьвярнуцца па абарону ў пракуратуру. Да заявы далучыў адпаведныя звароты ў Клецкі райвыканкам і афіцыйныя адказы чыноўнікаў, а таксама фотаздымкі і публікацыі ў беларускіх СМІ, — паведаміў “Свабодзе” Сяргей Панамароў.
Сустрэча старшыні Беларускага таварыства аховы помнікаў гісторыі і культуры Антона Астаповіча з насельніцтвам Клецкага раёну была выклікана пачаткам самавольнай перабудовы помніка гісторыі Беларусі, былога дамініканскага храму.