У Пінску праходзяць вулічныя акцыі і распаўсюджваюць улёткі з інфармацыяй пра Аляксандра Баразенку — свайго земляка, які ўтрымліваецца цяпер у Менску ў СІЗА.
У Пінску ў апошнія дні адбыліся дзьве вулічныя акцыі ў абарону Аляксандра Баразенкі. Цяпер рыхтуюцца наступныя. Пра гэта заяўляе актывіст Руху “За свабоду” Ігар Салавей.
“Будзе, так. Плянуем на днях правесьці яшчэ акцыі. Людзі, якія знаёмяцца з улёткамі, абураюцца, што зноў зьявіліся палітычныя вязьні ў Беларусі. Адзін мужчына сказаў: “Што, турмы ўжо вольныя, то зноў можна людзей арыштоўваць?” І пінскія прадпрымальнікі вельмі добра рэагавалі, казалі, што хлопец і за іх інтарэсы змагаецца”.
Аляксандра Баразенку цяпер абвінавачваюць па крымінальнай справе 14-ці актывістаў “Маладога фронту”, якіх затрымалі 21 студзеня падчас акцыі прадпрымальнікаў у Менску. 13 чалавек былі пакараныя абмежаваньнем волі і штрафамі. Аляксандар Баразенка — апошні ў сьпісе абвінавачаных. Яго арыштавалі нядаўна, 27 кастрычніка, пасьля допыту ў сьледчым камітэце. Да гэтага часу маладзён знаходзіўся на навучаньні ў Польшчы.
Якія на сёньня весткі з “Валадаркі” ад Аляксандра? Адказ на пытаньне высьвятляю ў гутарцы зь яго бацькам Аляксандрам Міхайлавічам:
“Я быў у мінулы чацьвер у Менску. Наведаў сьледчага, атрымаў дазвол на спатканьне з сынам. Сустрэўся зь ім. Аляксандар быў бадзёры і вясёлы. Трымаецца годна”.
Пра тое, чаму перасьледуюць ягонага сына, Баразенка-старэйшы разважае:
“Калі казаць па шчырасьці, то, пэўна, ні вам, ні мне не даводзіцца гэтаму дзівіцца. Зноў жа відавочныя праявы рэжыму. Цяперашні кіраўнік праз сваю паказушную лібэралізацыю дамогся ляяльнасьці Захаду, а цяпер, як той казаў, зноў можна весьці сваю гульню”.
Аляксандар Баразенка двойчы адбываў арышты: у 2007 годзе — за ўдзел у моладзевай акцыі супраць скасаваньня льготаў, сёлета — за ўдзел у акцыі прадпрымальнікаў. Ад траўня сьледчыя падалі яго ў крымінальны вышук як падазраванага ў “справе 14-ці”.
Аляксандар вучыцца на другім курсе Ўроцлаўскага ўнівэрсытэту па праграме Кастуся Каліноўскага. Ад 28 кастрычніка актывісты дэмакратычнага руху пачалі ладзіць акцыі салідарнасьці з Аляксандрам у розных месцах Менску.