Прэсавы сакратар менскай гарадзкой міліцыі Аляксандар Ластоўскі сказаў, што ня мае ніякай інфармацыі наконт графіці з выявай намесьніцы старшыні Савету Рэспублікі Марыяны Шчоткінай.
Графіці з выявай Марыяны Шчоткінай і надпісам «Гэта я аўтар падатку для беспрацоўных» зьявілася ў Менску на вуліцы Карла Маркса, 17.
На пытаньне, ці вядзе міліцыя нейкае расьсьледаваньне адносна гэтага графіці, Аляксандар Ластоўскі сказаў: «Ня ведаю, інфармацыі ніякай ня маю».
Карэспандэнт Свабоды зьвярнуўся ў Міністэрства працы і сацыяльнай абароны, каб высьветліць, хто ж быў аўтарам збору зь беспрацоўных, які прапісаны ў дэкрэце № 3.
Прэс-сакратар Міністэрства працы і сацыяльнай абароны Тацяна Максімава параіла зьвярнуцца да матэрыялаў у інтэрнэце.
— Чытайце інтэрнэт, там усё напісана. Міністэрства працы і сацыяльнай абароны выступае зводнікам па гэтым дакумэнце. Мы абагульнялі і ўносілі яго непасрэдна. Мы яго зводзілі з улікам усіх рэкамэндацыяў і пажаданьняў органаў і ўносілі. Ня больш за тое. Хто быў ініцыятарам — сказаць не магу, вэрсій многа.
— Магчыма, гэта ўсё ж была Марыяна Шчоткіна?
— Яна ў гэты час зьяўлялася міністрам, ня больш за тое.
— Яна ініцыявала гэты падатак?
— Я не магу вам так сказаць. Гэта няправільна.
— Дык а хто тады? Усё ж быў нейкі чалавек, які сказаў, што мы робім такі падатак.
— Я не магу вам сказаць, хто гэта. У нас было даручэньне, якое міністэрства выканала.
— А даручэньне ад каго?
— Я не працавала ў гэты час, і мне складана сказаць, якія былі дакумэнты і які быў ход дакумэнтаў... Вы хочаце пачуць, хто быў ініцыятарам гэтага дэкрэту?
— Так, хто быў аўтарам падатку «на дармаедзтва», падатку на беспрацоўных?
— Вы ж цудоўна бачыце ўсё, што напісана ў інтэрнэце.
У Міністэрстве працы і сацыяльнай абароны адмовіліся камэнтаваць пратэсты супраць дэкрэту № 3.
«Пакуль мы не гаворым на тэму дэкрэту», — сказала Тацяна Максімава.
Яна дадала, што інтэрвію з кімсьці з чыноўнікаў міністэрства «пакуль не атрымаецца».
Раніцай 5 сакавіка выява экс-міністра працы, намесьніцы старшыні Савету Рэспублікі Марыяны Шчоткінай у поўны рост была наклеена на агароджы каля кавярні «Мануфактура» ў дварах паміж праспэктам Незалежнасьці і вуліцай Карла Маркса. Па абедзе выяву Шчоткінай з подпісам «Гэта я аўтар падатку для беспрацоўных» замазалі.
Паводле СМІ, Марыяна Шчоткіна была ініцыятаркай дэкрэту № 3 «Аб прадухіленьні сацыяльнага ўтрыманства», які выклікаў масавыя пратэсты ў розных гарадах Беларусі.
