Берасьцейскіх блогераў Аляксандра Кабанава і Сяргея Пятрухіна затрымалі 23 лютага напярэдадні абвешчанай імі акцыі супраць будаўніцтва акумулятарнага заводу. Выходныя яны правялі ў пастарунку.
26 лютага ў судзе Ленінскага раёну затрыманыя запатрабавалі ўдзелу ў працэсе адваката. Суд задаволіў хадайніцтвы і абвясьціў перапынак да 28 лютага. Да гэтага часу блогераў вызвалілі.
Сяргей Пятрухін сказаў, што іх абвінавацілі ў закліках да несанкцыянаванай масавай акцыі.
«Мяне затрымлівалі амапаўцы ў цывільным і адзін міліцыянт у форме. Кабанаў у той момант ня быў са мной, але яго затрымалі адначасова са мной і на цывільных машынах даставілі ў ізалятар Ленінскага РАУС», — апавёў Сяргей Пятрухін.
На месца правядзеньня акцыі 25 лютага, калі Пятрухін і Кабанаў былі ў ізалятары, прыйшло некалькі дзясяткаў чалавек.
Раней абодвум блогерам пракуратура вынесла папярэджаньні за заклікі да несанкцыянаванай акцыі.
Суд над Аляксандрам Кабанавым пачнецца 28 лютага ў 9:30, над Сяргеем Пятрухіным — у 10:30.
