Міжнароднае рэйтынгавае агенцтва Standard & Poorʼs 6 красавіка пацьвердзіла крэдытныя рэйтынгі Беларусі на ўзроўні «B/B» са «стабільным» доўгатэрміновым прагнозам.
Як піша Tut.by, экспэрты прагназуюць, што рэальны валавы ўнутраны прадукт Беларусі вернецца на «дакрызісны» ўзровень 2014 году толькі ў канцы 2019-га. Цяперашні эканамічны рост абумоўлены нармалізацыяй стасункаў з Расеяй, аднаўленьнем паставак нафты і аднаўленьнем попыту з Расеі і некалькіх эўрапейскіх краінаў.
Разам з тым Беларусь застаецца залежнай ад сыравінных тавараў — на паліўную, хімічную і мэталюргічную прамысловасьць прыпадае амаль палова экспарту Беларусі.
Калі цэны на нафту будуць падаць, гэта нэгатыўна паўплывае на эканоміку Расеі, а значыць, і на аб’ёмы беларускага экспарту. «Нафтагазавыя войны» з Расеяй нібыта завяршыліся, але Standard & Poorʼs не выключае аднаўленьня спрэчак. Да таго ж цяперашнія спрэчкі наконт паставак у Расею беларускай малочнай прадукцыі могуць мець нэгатыўныя наступствы для Беларусі — на Расею прыпадае больш як 40% замежнага гандлю Беларусі, эскаляцыя спрэчак можа пагражаць іншым сфэрам гандлю.
