Ігар Аліневіч — першы ляўрэат прэміі Аляхновіча за кнігу «Еду в Магадан»

Падышоў час назваць ляўрэятаў, і на сцэну зноў выходзяць Аляксандар Лукашук і Андрэй Хадановіч:

«Рашэньне, якое прынялі сябры журы, сыходзіць з таго, што прадстаўленыя творы — не канкурэнты паміж сабой. Але паміж імі ёсьць розьніца, некаторыя існуюць у выглядзе рукапісаў, якія будуць яшчэ расьці і разьвівацца і могуць узяць удзел у наступным конкурсе ў наступным годзе»

Дыплёмамі адзначаюцца ўдзельнікі конкурсу Сергей Аўчыньнікаў, Зьміцер Дашкевіч, Дзьмітры Карпіцкі, Сяржук Доўгушаў

Сяргей Доўгушаў, як і абяцаў у пачатку імпрэзы, узяў у рукі гітару, каб выканаць адну з сваіх песьняў. «Музыка і песьні вельмі дапамагалі вязьням за кратамі, — кажа Сяргей і нечакана дадае — «Я б увогуле хацеў, каб у кожнай камэры сядзеў музыкант». Гэтыя ягоныя словы патанаюць у агульным сьмеху. «Твая мара недалёкая ад ажыцьцяўленьне», — кідае з месца Ўладзімер Някляеў.

«У камэры мяне празвалі „камэрны сьпявак“. Так я з артыста Белдзяржфілярмоніі пераўтварыўся ў выканаўцу камэрнага жанру» — жартуе Сяржук Доўгушаў і выконвае італьянскую песьню

Працягваецца ганараваньне дыплямантаў. Дыплёмамі ганаруюцца Аляксандар Францкевіч і Ірына Халіп.

Надышла чарга ляўрэатаў. Ганаруецца Павал Севярынец, за зборнік «Беларуская глыбіня», у якой таленавіта адлюстраваныя каштоўнасьці чалавечага духу і свабоды. «Беларуская турэмная літаратура — гэта пэўны фэномэн і зьява агульнаэўрапейскай культуры», — кажа Севярынец, прымаючы дыплём.

Дыплёмам ляўрэата ганаруецца Анатоль Лябедзька. «Жадаю ўсім, каб вы ўсе што-небудзь яшчэ напісалі. Але на іншую тэму. Пра каханьне, пра грамадзкі транспарт, пра што заўгодна. Адзінае, з чым я не магу пагадзіцца з арганізатарамі. Гэта не турэмная літаратура, гэта літаратура пра змаганьне», — кажа Лябедзька.

Ганаруецца Алесь Кіркевіч. «Спадзяюся, што мы хутка ўбачымся з тымі ўдзельнікамі прэміі, якія яшчэ знаходзяцца за кратамі», — кажа ён

Ляўрэацкай прэміяй узнагароджваецца Алесь Бяляцкі. Прэмію прымае ягоная жонка Натальля Пінчук.

«Значная частка ўдзельнікаў гэтага конкурсу яшчэ знаходзіцца за кратамі. У тым ліку і Алесь. На волі ў яго не было часу займацца літаратуразнаўствам. За кратамі ён працягвае паісаць і зараз, рыхтуецца яшчэ адна кніга. Хачу верыць, што сваёй творчай дзейнасьцю Алесь будзе займацца на свабодзе», — кажа Натальля

Наступны дыплём ляўрэата ідзе Юрыю Бандажэўскаму, які выйшаў на сувязь па скайпу. «Веру, мы заваюем свабоду, сустрэнемся, і я ўбачу ўсіх вас, убачу радзіму»

Першую прэмію за твор «Еду в Магадан» атрымлівае Ігар Аліневіч.

Андрэй Хадановіч: У журы была нялёгкая задача выбіраць сярод аднолькава годных і важных твораў. Мы выбралі 6 дыплямантаў, 6 ляўрэатаў. Але адна кніга ўсё ж стаіць асобна. Гэта «Еду в Магадан» Ігара Аліневіча

Мама Ігара, Валянціна Аліневіч: «Я стала сэнтымэнтальнай апошнім часам. Паслухала тут песьню, і падумала, што мы не заўсёды цэнім тыя простыя рэчы, якія мы маем на волі». Валянціна Аліневіч распавядае, як самыя розныя людзі ведаюць пра кнігу Ігара. «Трэба зрабіць усё дзеля таго, каб іншыя маці не атрымлівалі прэміі за кнігі, якія іх сыны пішуць у турмах»

Валянціна Аліневіч асабліва дзякуе Радыё Свабода за тую ўвагу, якую Беларуская Свабода надае тэматыцы правоў чалавека і сытуацыі ў беларускіх месцах зьняволеньня. Дзякуе газэце «Новы час», якая першая надрукавала ўрыўкі з кнігі Ігара Аліневіча, сябрам і паплечнікам Ігара, якая выдалі гэтую кнігу

Аляксандар Лукашук на завяршэньне імпрэзы абяцае, што творы ўдзельнікаў конкурсу будуць гучаць на хвалях Радыё Свабода. Андрэй Хадановіч паведаміў, што кніга пераможцы – Ігара Аліневіча будзе неўзабаве перакладзеная на беларускую мову