Беларуская кампанія «Энэргаактыў» прапанавала арэнду памяшканьняў для «здабычы» крыптавалютаў. Паслугу прэзэнтуюць як «майнінг-гатэль».
Пляцоўка ў Лідзе плошчай 2250 м² мае «натуральную сыстэму ахалоджваньня і вэнтыляцыі» і дадатковыя кандыцыянэры, магутнасьць энэргасеткі да 1,2 МВт, тэрыторыя агароджаная, уваход праз прапускны пункт, відэаназіраньне, прапануецца страхоўка.
Паводле нядаўняга «ІТ-дэкрэту», у Беларусі легалізаваныя здабыча, пакупка і продаж крыптавалютаў. Да 2023 году апэрацыі з крыптавалютамі не абкладаюцца падаткамі, ня лічацца прадпрымальніцкай дзейнасьцю, калі імі займаецца фізычная асоба.
Ці можна біткойнамі плаціць за тавары і паслугі ў Беларусі
Нацбанк забараняе карыстацца крыптавалютамі як сродкам аплаты (забараніць купляць за тыя ж біткойны тавары і паслугі, толькі мяняць біткойны на «звычайныя» грошы), а прэм’ер-міністар заяўляў, што допуск крыптавалютаў ва ўнутранае абарачэньне «не разглядаецца».
Нягледзячы на гэта, БелАЗ гатовы прадаваць свае машыны за крыптавалюты, а акадэмікі цалкам сур’ёзна прапануюць пусьціць энэргію БелАЭС на майнінг крыптавалютаў.
