Дзень Волі − 2015: пад беларускімі, украінскімі і эўрапейскімі сьцягамі ЖЫВЫ БЛОГ

Сярод удзельнікаў зьявіўся мужчына моцна нападпітку. Арганізатары акцыі зьвярнуліся да міліцыянтаў, каб тыя вывелі мужчыну з натоўпу. Міліцыянты адвялі яго ад месца збору ўдзельнікаў акцыі.

Аўтазакі на П. Броўкі

Паводле ацэнак карэспандэнтаў Радыё Свабода, цяпер каля кінатэатра “Кастрычнік” знаходзіцца 300 чалавек. Ёсьць некалькі хлопцаў зь бел-чырвона-белымі сьцягамі і ў чорных масках, якія цалкам хаваюць іх твары. Арганізаваны збор грошай палітвязьню Яўгену Васьковічу. Удзельнікам раздаюць міні-сьпеўнічкі з тэкстамі песень “Грай”, “Пагоня”, “Наш сьцяг” і “Ня быць скотам”.

Удзельнікаў ужо больш за сотню. Апроч бел-чырвона-белых сьцягоў, ёсьць сьцягі Эўразьвязу, Украіны і прафсаюзу РЭП. Сярод расьцяжак – «Беларусь – у Эўропу», «Мы – эўрапейцы», «Крым – Украіне, шчасьце – краіне». Удзельнікі скандуюць «Жыве Беларусь».

На месца збору пачынаюць прыходзіць удзельнікі акцыі. Разгорнута некалькі бел-чырвона-белых сьцягоў. Ёсьць людзі ў вышыванках і ў майках з нацыянальнай сымболікай. На пляцоўцы перад кінатэатрам «Кастрычнік» – некалькі дзясяткаў лядзей у цывільным. У падземным пераходзе – міліцыянты ў форме.