Цягам лета 2018 году Беларускі рэспубліканскі саюз моладзі плянуе накіраваць у Малдову і Казахстан «сельскагаспадарчыя атрады» па 60 чалавек, піша Minsknews.by.
Агулам за лета БРСМ плянуе ўладкаваць на працу ня менш за мінулы год — то значыць, ня менш за 21 тысячу чалавек. Ужо заключаная дамова на «сельскагаспадарчыя атрады» на 60 чалавек з Малдовай, падобная дамова заплянаваная з Казахстанам. Колькі заплоцяць за працу, не ўдакладняецца.
Таксама 154 студэнты з ВНУ Беларусі і Расеі маюць працаваць на будоўлі БелАЭС — там абяцаюць 1000–1500 рублёў за няпоўныя два месяцы працы з 3 ліпеня па 22 жніўня (выходзіць 600–900 рублёў на месяц).
У сакавіку 2018 году сярэдні заробак у «расьліннай» галіне сельскай гаспадаркі склаў у Беларусі 563,6 рубля на месяц, у будаўніцтве — 910,7 рубля. У сярэднім заробку ўлічваюцца і тыя грошы, што атрымліваюць нізкакваліфікаваныя працаўнікі, і высокакваліфікаваныя адмыслоўцы і мэнэджэры.
