Прэзыдэнт Польшчы павіншаваў беларусаў зь юбілеем БНР
Прэзыдэнт Анджэй Дуда зьвярнуўся зь віншавальным лістом да беларусаў з нагоды 100-годзьдзя абвяшчэньня Беларускай Народнай Рэспублікі.
У паведамленьні, разьмешчаным на сайце галавы польскай дзяржавы, гаворыцца:
«25 сакавіка 1918 году была абвешчаная Беларуская Народная Рэспубліка. У 100 гадавіну гэтай падзеі ўсім Беларусам, якіх з Польскім Народам яднае супольная гісторыя і культура – перадаю сардэчныя пажаданьні ўсяго найлепшага і посьпехаў у разьвіцьці іх Бацькаўшчыны».
Анджэй Дуда стаў першым прэзыдэнтам дзяржавы, які зьвярнуўся да беларусаў зь віншавальным лістом з нагоды Дня Волі. Аляксандар Лукашэнка праігнараваў гэтую дату.
У Гомелі на Дзень Волі праходзіць экскурсія
У Гомлі ад сквэру Кірылы Тураўскага пачалася гістарычная экскурсія, зьвязаная зь Першым Усебеларускім зьездам у сьнежні 1917 году, а таксама складаным лёсам гораду над Сожам у часы абвяшчэньня беларускай дзяржаўнасьці. Першы адрас экскурсіі — побач, гэта фабрыка «Палесдрук», дзе ў 1917 годзе была гарадзкая дума. Яна накіравала сваіх дэлегатаў на Ўсебеларускі зьезд у Менск, дзе вырашаўся будучы лёс Беларусі. Вядзе экскурсію гомельскі гісторык і журналіст Яўген Меркіс. Экскурсантаў больш за два дзясяткі.
Пляцоўка перад тэатрам опэры цяпер
На Нямізе, дзе сёньня раней людзі ў цывільным кропкава «адлоўлівалі» мінакоў з нацыянальнай сымболікай, цяпер спакойна, перадае карэспандэнтка Свабоды Аляксандра Дынько.
«Пакуль затрыманьняў ня бачу, людзей са сьцягамі таксама. Усіх, хто выходзіць з пляцоўкі сьвята ля Опэрнага тэатру папярэджваюць, каб хавалі сымболіку».
Затрымалі журналістку Адар’ю Гуштын
На вуліцы Багдановіча побач з пляцоўкай Опэрнага тэатру затрымалі журналістку Адар’ю Гуштын, якая ішла са сьцягам на плячах. Гуштын адмовілася зьняць сьцяг, таму і забралі, паведаміў Свабодзе рэдактар «Нашай нівы» Ягор Марціновіч.
Сьвятлана Алексіевіч напісала зварот з нагоды Дня Волі
Падчас канцэрту «Сьвята Незалежнасьці» ля Опэрнага тэатру ў Менску вядучая Зінаіда Бандарэнка зачытала зварот ад нобэлеўскай ляўрэаткі Сьвятланы Алексіевіч, піша TUT.BY.
«Сталін зрабіў зь беларусаў расейцаў. Сталін разумеў, што без нацыянальнай ідэі і мовы няма народу, таму зьнішчалася ў першую чаргу інтэлігенцыя. Але гэтыя людзі на балоце выстаялі, выжылі. Ніколі не памірала народная душа. Першы здымак першага Усебеларускага зьезду паказвае нам твары свабодных людзей. Праз 100 гадоў мы ведаем, што БНР была і мы адтуль. Тыя, хто вырас у СССР, нічога пра яе ня ведалі ці казалі, што вырасьлі без мінулага. Хто такі беларус? Гэта чалавек, які марыць аб свабодзе; Але мы яе не баімся. Свабода – гэта жорсткая рэч, яна патрабуе веры і годнасьці, дысцыпліны і высакароднасьці. Мы з вамі пішам гісторыю сваёй свабоды».
У Магілёве вызвалілі 11 актывістаў руху «Маці 328»
У Магілёве больш за пяць гадзін утрымлівалі ў раённым аддзеле міліцыі 11 актывістаў руху «Маці 328». Гэты рух аб’ядноўвае сваякоў грамадзян, асуджаных за злачынствы, зьвязаныя з пашырэньнем наркотыкаў. Машыну спынілі пад Магілёвам, каля вёскі Сумарокава. Міліцыянты заявілі, што, паводле іх зьвестак, мікрааўтобусам перавозяцца наркотыкі. Затрыманьне адбылося а дзясятай гадзіне.
Дзень Волі на Магілёўшчыне: затрыманьні, малітва за Беларусь, юбілей БНР на магіле паўстанца-каліноўца
Паводле Паўла Белавуса, на ўваходзе праз рамкі валянтэры раздалі каля 40 000 – 50 000 праграмак «Сьвята Незалежнасьці». Гэтую інфармацыю абвесьцілі і са сцэны.
Трое затрыманых у майках назіральнікаў на плошчы Якуба Коласа знаходзяцца ў Савецкім РАУС. Сярод іх назіральніца БХК Тацяна Самнікава, паводле яе словаў, ёй выкручваюць пальцы, здымаюць пірсынг, дзёргаюць за валасы. Назіральнікаў абвінавачваюць ва ўдзеле ў забароненым шэсьці ў супраціве міліцыі.
У Віцебску Дзень Волі адзначылі ўскладаньнем кветак
Тутэйшыя актывісты адмовіліся ад ідэі праводзіць мітынг у парку на ўскраіне, хоць улады яго і дазволілі. Замест гэтага вырашылі ўскласьці кветкі ў знакавых мясьцінах гораду.
Удзельнік руху «Дзея» Пятро Маркелаў паведаміў Радыё Свабода, што на «Сьвята Незалежнасьці» у Слуцку прыйшлі каля 80 чалавек. Пасьля завяршэньня канцэрту арганізатараў мерапрыемства пільнавалі, а пасьля затрымалі.
Някляеў напісаў верш з-за кратаў да 100-годзьдзя БНР
На старонцы Ўладзімера Някляева ў фэйсбуку зьявіўся ягоны верш з-за кратаў «Дзень Волі. Да 100-годзьдзя БНР».
На выхадзе з пляцоўкі «Сьвята Незалежнасьці» на вуліцы Янкі Купалы затрымалі Багуслава Цыганкова, перадае Іна Студзінская. Багуслаў Цыганкоў выйшаў з бацькамі з пляцоўкі Опэрнага тэатру, прайшоў каля пяці мэтраў і спыніўся сфатаграфаваць і два супрацоўнікі ў цывільным пацягнулі яго ў сіні бус.
Маці затрыманага Вольгу Цыганкову кінулі на асфальт. Вольга і Віталь Цыганковы паехалі разьбірацца ў Цэнтральны РАУС.
Мітынг-канцэрт каля Тэатру опэры і балету ў Менску скончыўся супольным выкананьнем гімну «Мы выйдзем шчыльнымі радамі». Старшыня Партыі БНФ заклікаў усіх спакойна разыходзіцца і не ўступаць у канфлікты зь міліцыяй.
Вынікі Дня Волі. Ужывую
Паводле дадзеных прэс-службы Беларускай асацыяцыі журналістаў, пры асьвятленьні сьвяткаваньняў 100-годзьдзя БНР былі затрыманыя і пасьля адпушчаныя сем журналістаў, якія супрацоўнічаюць з тэлеканалам “Белсат»
Журналістаў Любоў Лунёву, Станіслава Івашкевіча, Ігара Ільяша, Кацярыну Андрэеву і Сяргея Кавалёва вызвалілі з міліцыі без складання пратаколаў. Андрэй Козел і Вольга Чайчыц таксама на волі.
Журналістак Галіну Абакунчык і Адарʼю Гуштын вызвалілі з Цэнтральнага РУУС без складаньня пратаколаў
Паводле Галіны Абакунчык, у пастарунку засталіся два затрыманыя — Аляксандар Варожка і Багуслаў Цыганкоў. У Цыганкова сілай узялі адбіткі пальцаў.
Галіна Абакунчык расказала, што ва ўсіх затрыманых пры сабе былі бел-чырвона-белыя сьцяжкі. Яе таксама затрымалі, пабачыўшы сьцяжок.
«Я ішла ад Опэрнага тэатру да станцыі мэтро „Няміга“. У мяне ў руках былі галінкі вярбы, кветкі і маленькі сьцяжок. Пабачыла, што спыніўся сіні бус, паспрабавала забегчы ў мэтро, але мяне дагналі і сказалі, што забіраюць для разьбіральніцтва. Потым перасадзілі ў легкавы аўтамабіль, а сіні бус пагнаўся за хлопцам зь вялікім бел-чырвона-белым сьцягам. У пастарунку ў мяне адабралі рэчы, не давалі званіць, не выводзілі ў прыбіральню. Сказалі здаць адбіткі пальцаў, але я адмовілася. Пратрымалі тры з паловай гадзіны без тлумачэньня прычын».
Затрыманьні пасьля канцэрту #БНР100
На выхадзе з пляцоўкі «Сьвята Незалежнасьці» ля Опэрнага тэатру ў Менску затрымліваюць людзей зь бел-чырвона-белымі сьцягамі.
На сьвяточным канцэрце ў Гомлі выступіў N.R.M
У Гомлі сотыя угодкі БНР адзначылі канцэртам у арт-сядзібе «Каўчэг». Адкрылі яго віншаваньнямі вядоўцы Юліяна Пятрэнка і Яўген Меркіс. Яны зрабілі невялікі экскурс у гісторыю стварэньня БНР — у якой чынны ўдзел брала ўраджэнка Гомлі, міністарка апекі Рады БНР Палута Бадунова. Разам з бардам Вольгай Цярэшчанка ўдзельнікі сьвяточнай імпрэзы сьпявалі разам гімн БНР «Мы выйдзем шчыльнымі радамі», «Магутны Божа». Выступіў знакаміты гурт N.R.M на чале зь Пітам Паўлавым.
