«Ва Ўкраіне мы проста ўжо ўсе вузкакалейкі аб’езьдзілі, — расказвае адзін з удзельнікаў экскурсіі па вузкакалейцы, Валер з Украіны. — Папраўдзе іх там ня шмат, іх там тры. А ў Беларусі іх трошкі болей».
Трошкі болей — гэта 32 вузкакалейкі: адна зь іх — дзіцячая чыгунка ў Менску, яшчэ адна — у заасадзе ў Магілёве, астатнія належаць розным прамысловым прадпрыемствам. Арцём Сьлізкі, арганізатар экскурсіі і аўтар праекта 750mm.by, тлумачыць , што экскурсію на торфабрыкетнае вытворчае ўпраўленьне «Бярозаўскае» выбралі менавіта таму, што гэта самы «лясны» маршрут, а лес прыгожы ў любую пару году. Нягледзячы на халоднае зімовае надвор’е, абодва дні экскурсіі ў Арцёма з аншлягам: і ў суботу, і ў нядзелю — болей за 30 турыстаў у маленькім вагончыку цягнічка.
«Першая мая думка... Ну мы ня думалі, што гэта некаму будзе цікава», — дзеліцца Аляксей Аляксандравіч, галоўны інжынэр торфабрыкетнага вытворчага ўпраўленьня «Бярозаўскае». Гэта адна зь першых спробаў для іх прадпрыемства ў галіне прамысловага турызму.
«Мяне яшчэ падштурхнула тое, каб людзям данесьці — ня проста што ёсьць вузкакалейка, ёсьць вагончык, ёсьць цеплавоз, а ёсьць і тая нялёгкая праца, якой людзі займаюцца. Каб людзі пабачылі, што мы ня проста тут зямлю капаем, а сапраўды займаемся добрай справай».
Як выглядае паездка вузкакалейнай чыгункай з кабіны машыніста і з вышыні птушынага палёту — у відэа Радыё Свабоды.
