БАГДАД. Міністар абароны Польшчы Ежы Шмайдзіньскі які прыляцеў сёньня ў Ірак пасьля таго, як стала вядома пра сьмерць чарговага польскага жаўнера, заявіў, што тактыка польскага войска ў Іраку будзе зьмененая.
Паводле Шмайдзіньскага, польскія жаўнеры напэўна не акапаюцца ў сваіх базах, бо гэта пагоршыла б сытуацыю ў сэктары, за які адказвае міжнародная дывізія пад польскім камандаваньнем.
Міністар заявіў, што ў бліжэйшы час Ірак наведае адмысловая камісія, каб ацаніць стан вайсковай тэхнікі, якой карыстаюцца палякі, ды высьвятліць, што трэба зьмяніць ці больш дакладна прыстасаваць да ірацкіх ўмоваў.
Між тым у Нэджэфе працягваюцца цяжкія баі паміж прыхільнікамі радыкальнага шыіцкага клірыка Мактады Ас-Садра і войскамі кааліцыі.
Прадстаўнік Ас-Садра заявіў, што перадача мячэці Імам Алі вышэйшаму духоўнаму лідэру ірацкіх шыітаў аятале Алі Ас Сістані прыпыненая.