1 красавіка на сайце дзяржаўнага агенцтва «Минск-новости» зьявілася навіна з спасылкай на прэс-службу Нацыянальнага банку пра тое, што ў Беларусі зьявіцца нацыянальная крыптавалюта «зубр». Гэта быў першакрасавіцкі жарт. На трэці дзень на «навіну» адрэагавалі ў Нацбанку.
«👎 Жарт, вядома, „удаўся“. У Нацыянальны банк нават сталі паступаць званкі грамадзян, якія жадаюць купіць „зубра“. Вось толькі да рэальнасьці гэтая „навіна“ ня мае ні найменшага дачыненьня», — напісала прэс-служба Нацыянальнага банку ў Тэлеграме.
Нацыянальны банк Беларусі падкрэсьліў, што «не плянаваў і не плянуе выпускаць сваю крыптавалюту» і што калі б такія пляны былі, пра гэта абавязкова паведамілі на афіцыйным сайце nbrb.by і ў Тэлеграме.
«Што тычыцца творчай фантазіі журналістаў, просім калегаў зьвярнуць увагу на адзін вельмі важны момант: заўсёды знойдуцца ашуканцы, якія жадаюць прадаць даверлівым грамадзянам „новую крыптавалюту“. Таму заклікаем больш адказна падыходзіць да выбару тэмаў для першакрасавіцкіх жартаў», — гаворыцца ў паведамленьні.
Форум