У Міністэрстве абароны Беларусі паведамілі аб пачатку 24 сакавіка новай праверкі баявой гатоўнасьці Ўзброеных сіл Беларусі.
Як адзначаецца ў паведамленьні, праверку на даручэньне Аляксандра Лукашэнкі пачаў Дзяржаўны сакратарыят Савета бясьпекі.
Згодна зь інфармацыяй Мінабароны, асабовы склад выканае комплекс мерапрыемстваў па падрыхтоўцы тэхнікі і ўзбраеньня да выкананьня навучальна-баявых задач, у тым ліку ажыцьцяўляць загрузку матэрыяльных сродкаў і ажыцьцявіць выхад на адзін з вайсковых палігонаў.
Для стварэньня абстаноўкі, набліжанай да баявой, з улікам досьведу «сучасных ваенных канфліктаў» сплянавана задзейнічаньне як ударных, так і выведных дронаў, а таксама авіяцыі.
25 сакавіка адбудзецца інаўгурацыя Аляксандра Лукашэнкі. У яе часе ў цэнтральнай частцы гораду на асобных участках праспэкту Незалежнасьці і праспэкту Пераможцаў будзе ўводзіцца кароткачасовае абмежаваньне руху ўсіх відаў транспарту, уключаючы грамадзкі.
Кіраўніцтва Беларусі падтрымала агрэсію Расеі супраць Украіны і дазволіла скарыстаць вайсковую інфраструктуру і паветраную прастору для ўварваньня расейскай арміі і абстрэлаў мірных гарадоў Украіны, ахвярамі якіх сталі дзясяткі тысяч цывільных украінцаў.
Беларусь, пачынаючы з 2022 году, практычна ў бесьперапынным рэжыме праводзіць вайсковыя вучэньні на сваёй тэрыторыі, у Расеі і ў іншых краінах АДКБ.
Украіна закрыла мяжу зь Беларусьсю, спыніла гандаль, арыштавала маёмасьць і прадукцыю беларускіх прадпрыемстваў і пачала ўмацоўваць сваю мяжу на беларускім кірунку, каб зрабіць немагчымым паўторны наступ расейскіх войскаў зь беларускай тэрыторыі.
Форум