У Беларусі адкрылі новы комплекс для памежнай заставы «Нароўля» на мяжы з Украінай

У Дзяржаўным памежным камітэце паведамілі аб адкрыцьці новага комплексу памежнай заставы «Нароўля» Мазырскага памежнага атраду.

Як адзначаецца ў афіцыйным паведамленьні, гэты падразьдзел пачаў ахоўваць мяжу з Украінай 31 кастрычніка 2018 году.

Спачатку памежнікі месьціліся ў адным з памяшканьняў, што належала Нараўлянскай перасоўнай мэханізаванай калёне. На яе тэрыторыі быў разьмешчаны комплекс службовых, спальных і складзкіх памяшканьняў.

«У сувязі з новымі рызыкамі з боку сумежнай дзяржавы, а таксама павелічэньнем 3 траўня 2021 году ўчастку, які падлягаў ахове, памежны пост „Нароўля“ пераўтварылі ў памежную заставу», — патлумачылі ў Дзяржаўным памежным камітэце Беларусі.

Новы комплекс пачалі будаваць у канцы лютага 2023 году. На тэрыторыі комплексу, апроч жылых памяшканьняў, абсталявалі месцы для захоўваньня і рамонту тэхнікі, гадавальнік для службовых сабак. Для заняткаў пабудавалі гарадок памежнай службы і спартовыя аб’екты.

Памежная застава «Нароўля» ахоўвае ўчастак дзяржаўнай мяжы з Украінай, даўжэйшы за 60 кілямэтраў. Мяжа праходзіць па тэрыторыі Палескага дзяржаўнага радыяцыйна-экалягічнага запаведніка. На гэтай тэрыторыі шмат балот.

ГЛЯДЗІЦЕ ТАКСАМА:

У памежжы Беларусі і Ўкраіны адначасова ўзьніклі пажары. Што адбылося?

• Кіраўніцтва Беларусі падтрымала агрэсію Расеі супраць Украіны і дазволіла скарыстаць вайсковую інфраструктуру і паветраную прастору для ўварваньня расейскай арміі і абстрэлаў мірных гарадоў Украіны, ахвярамі якіх сталі дзясяткі тысяч цывільных украінцаў.
• Пасьля гэтага Ўкраіна закрыла мяжу зь Беларусьсю, спыніла гандаль і пачала ўмацоўваць сваю мяжу на беларускім кірунку, каб зрабіць немагчымым паўторны наступ расейскіх войскаў зь беларускай тэрыторыі.
• Да студзеня 2023 году ў Ровенскай вобласьці Ўкраіны замінавалі ўвесь памежны пэрымэтар зь Беларусьсю, апроч балотных участкаў — агульнай працягласьцю 229 кілямэтраў. Агулам у канцы 2023 году шчыльнасьць усталяваных мінаў на памежнай з Расеяй і Беларусьсю тэрыторыі з чэрвеня 2022 году павялічылі ў 16 разоў і паставілі больш за 500 тысяч супрацьтанкавых мін.
• Украіна працягвае ўмацоўваць свае межы ў беларускім кірунку, ствараючы шматузроўневыя лініі абароны з інжынэрнымі фартыфікацыямі, супрацьтанкавымі равамі і мінна-выбуховымі загародамі.
• У Беларусі таксама збудавалі абарончыя ўмацаваньні на мяжы з Украінай.