«Розныя антыдэмакратычныя дзеяньні „Грузінскай мары“ парушылі асноўныя прынцыпы нашага амэрыкана-грузінскага стратэгічнага партнэрства, якое грунтуецца на агульных каштоўнасьцях і прыхільнасьці да дэмакратыі, вяршэнства закону, грамадзянскай супольнасьці, павагі да правоў чалавека і асноўных свабоды і барацьба з карупцыяй. У выніку Злучаныя Штаты прыпынілі гэты механізм», — падкрэсліваецца ў заяве.
Адзначаецца, што Вашынгтон і Эўразвяз шкадуюць аб рашэньні кіруючай партыі «Грузінская мара» прыпыніць працэс інтэграцыі з ЭЗ.
«Прыпыніўшы працэс уступлення Грузіі ў ЭЗ, „Грузінская мара“ адкінула магчымасьць больш цесных сувязяў з Эўропай і зрабіла Грузію больш уразлівай для Крамля. Грузінскі народ у пераважнай большасьці падтрымлівае інтэграцыю з Эўропай. Злучаныя Штаты асуджаюць празьмернае прымяненьне сілы паліцыяй супраць грузінаў, якія імкнуцца рэалізаваць свае правы на свабоду сходаў і выказвання меркаваньняў, у тым ліку свабоду мірнага пратэсту. Заклікаем усе бакі забясьпечыць мірны характар пратэстаў», — гаворыцца ў паведамленьні.
Дзярждэпартамэнт ЗША заклікае ўрад Грузіі вярнуцца на эўраатлантычны шлях, празрыста расьсьледаваць усе парушэньні на парлямэнцкіх выбарах і адмяніць антыдэмакратычныя законы, якія абмяжоўваюць свабоду сходаў і выказваньня меркаваньняў.
Грузія і ЗША падпісалі Хартыю аб стратэгічным партнэрстве ў студзені 2009 года. Дакумэнт накіраваны на паглыбленьне супрацоўніцтва паміж дзьвюма краінамі, у прыватнасьці ў сфэры абароны і бясьпекі.
Зараз у Грузіі працягваюцца пратэсты ў сувязі з рашэньнем кіруючай партыі «Грузінская мара» адмовіцца ад перамоваў з ЭЗ аб уступленьні да 2028 года. Грузінскія сілы бяспекі ўжылі слезацечны газ і вадамёты для разгону пратэстоўцаў.
Пасля парлямэнцкіх выбараў у кастрычніку, на якіх кіроўная партыя «Грузінская мара» набрала 54 працэнты галасоў, апазыцыя і заходнія ўрады заявілі, што галасаваньне было азмрочана парушэньнямі і расейскім уплывам.
Саламэ Зурабішвілі заявіла, што лічыць парлямэнт нелегітымным і застанецца на сваёй пасадзе да абраньня новага парлямэнту. Выбары прэзыдэнта ў Грузіі прызначаныя на 14 сьнежня.
Прэзыдэнтка Грузіі Саламэ Зурабішвілі на брыфінгу 30 лістапада заявіла, што яе паўнамоцтвы скончацца толькі пасьля правядзеньня новых парлямэнціх выбараў у Грузіі, якія будуць адпавядаць дэмакратычным стандартам і на якіх будуць прысутнічаць міжнародныя назіральнікі. Да таго часу, заявіла Зурабішвілі, яна застанецца на пасадзе і працягне барацьбу.
Форум