Гібель 67-гадовага беларуса, які 11 верасьня скокнуў з 6-га паверху варшаўскага шпіталя, расьсьледуюць паводле артыкулу «давядзеньне да суіцыду», паведамілі «Белсату» ў акруговай пракуратуры раёну Прага Поўнач.
Максымальнае пакараньне, прадугледжанае артыкулам, — 5 гадоў зьняволеньня. Сьледзтва вядзе польская паліцыя пад наглядам пракуратуры.
«Акруговая пракуратура зьдзяйсьняе нагляд за расьсьледаваннем справы аб давядзеньні да самазабойства шляхам угаворваньня або дапамаганьня, то бок учынку, прадугледжанага 151-м артыкулам Крымінальнага кодэксу», — паведаміў тэлеканалу «Белсат» прэс-сакратар акруговай пракуратуры раёну Прага Пулноц Норбэрт Валіньскі.
Ці ёсьць у справе падазраваныя, прадстаўнік пракуратуры не ўдакладніў. Паліцыя ад камэнтароў аб справе адмаўляецца.
Здарэньне адбылося 11 верасьня ў шпіталі на вуліцы Кандратовіча ў варшаўскім раёне Брудна. 67-гадовы грамадзянін Беларусі скокнуў з акна палаты на шостым паверсе і памёр на месцы.
Раней у лякарні паведамілі «Белсату», што беларуса шпіталізавалі 6 верасьня. Ягоны дыягназ прадстаўнік лякарні раскрыць адмовіўся, але адзначыў, што мужчыну меліся хутка выпісаць:
«Аніякіх складанасьцяў з пацыентам не было, ён быў у добрым кантакце з пэрсаналам. Мы чакалі, што яго выпішуць максымум празь некалькі дзён. Ягоны дыягназ ня быў цяжкім, і назіраўся выразны прагрэс у лячэньні ў правільным кірунку».
У лякарні таксама падкрэсьлілі, што пацыент паводзіў сябе адэкватна і нічога не прадвяшчала бяды.
Форум