Міністар унутраных спраў Беларусі Іван Кубракоў заявіў, што інструктарска-мэтадычныя заняткі «Столін-2024» для падразьдзелаў МУС арганізавалі на выпадак падзей, аналягічных прарыву ўкраінскімі сіламі расейскай мяжы ў Курскай вобласьці.
«У ведамстве прааналізавалі дзеяньні Ўзброеных сіл Украіны ў Курскай вобласьці Расеі. У сувязі з напружанай абстаноўкай на паўднёвых межах Беларусі ў памежжы разьмясьцілі спэцыяльныя падразьдзелы АМАПу і ўнутраных войскаў. Асноўная мэта — не дапусьціць заходу праціўніка ў населеныя пункты, забясьпечыць бясьпеку нашых грамадзян. У сувязі з гэтым арганізавалі апэратыўнае ўзаемадзеяньне з камандзірамі баявых падразьдзелаў, памежных войскаў, старшынямі абласных і раённых выканкамаў», — працытавала Івана Кубракова прэсавая служба МУС Беларусі.
На інструктажы прысутнічалі старшыні Берасьцейскага і Гомельскага аблвыканкамаў Пётра Пархомчык і Іван Крупко, камандуючы ўнутранымі войскамі Мікалай Карпянкоў, кіраўнікі падразьдзелаў МУС, начальнікі сталічнага, абласных і раённых упраўленьняў унутраных спраў, іхныя намесьнікі, кіраўнікі райвыканкамаў памежных рэгіёнаў.
Паводле Івана Кубракова, такія намаганьні «дазволяць трымаць сытуацыю па кантролем і не дапусьціць пранікненьня дывэрсійна-выведных груп на нашу тэрыторыю».
Напярэдадні ў МУС паведамілі, што ў Берасьцейскай вобласьці, недалёка ад мяжы з Украінай, 11 верасьня пад кіраўніцтвам Івана Кубракова адбудуцца інструктарска-мэтадычныя заняткі «Столін-2024» для папярэджаньня «дзейнасьці незаконных узброеных фармаваньняў».
Жыхароў Століна папярэдзілі, што ў часе заняткаў — з 7:00 да 16:00 — будуць адбывацца выбухі піратэхнікі і перамяшчэньне спэцыяльнай тэхнікі. Апроч таго, спыняць рух на васьмі вуліцах раённага цэнтру — Дзяржынскага, Чырвонаармейскай, Інтэрнацыянальнай, Савецкай, Горкага, Чкалава, Карла Маркса і Церашковай.
Мясцовых жыхароў заклікалі «з разуменьнем ставіцца да часовых нязручнасьцяў».
Улады Беларусі цягам усёй ваеннай агрэсіі Расеі супраць Украіны пэрыядычна заяўляюць аб правакацыях, якія нібыта плянуюцца з украінскай, польскай ці літоўскай тэрыторыі.
Сёлета ў чэрвені ў Дзяржаўным памежным камітэце Беларусі заявілі, што ў Жытомірскай вобласьці ў зоне адказнасьці ўкраінскіх памежнікаў падразьдзелы Расейскага добраахвотніцкага корпусу праводзяць выведку, у тым ліку «з выхадам да дзяржаўнай мяжы Рэспублікі Беларусь».
Адразу пасьля гэтага ў Міністэрстве абароны Беларусі паведамілі, што на баявое дзяжурства на мяжы вывелі сыстэму «Палянэз» з поўным боекамплектам.
10 жніўня Аляксандар Лукашэнка абвінаваціў Узброеныя сілы Ўкраіны ў нібыта парушэньні паветранай прасторы Беларусі бесьпілётнікамі і заявіў, што беларускія войскі зьбілі некалькі цэляў. Неўзабаве пасьля гэтага міністар абароны Беларусі Віктар Хрэнін паведаміў, што на ўказаньне Лукашэнкі ўзмацняецца групоўка войскаў «на Гомельскім і Мазырскім тактычных кірунках з мэтай рэагаваньня на любыя магчымыя правакацыі».
- Аляксандар Лукашэнка падтрымаў поўнамаштабнае расейскае ўварваньне ва Ўкраіну 24 лютага 2022 году, дазволіўшы выкарыстоўваць тэрыторыю, вайсковую інфраструктуру і паветраную прастору Беларусі для ўварваньня расейскай арміі і абстрэлаў украінскіх гарадоў, ахвярамі чаго сталі дзясяткі тысяч мірных украінцаў.
Форум