У ноч на 7 верасьня 2024 году расейскія войскі атакавалі Ўкраіну ўдарнымі бесьпілётнікамі тыпу Shahed. Радыётэхнічныя войскі Паветраных сіл Украіны гулам выявілі 67 «Шахедаў», гаворыцца ў паведамленьні ўкраінскіх вайскоўцаў.
У выніку над тэрыторыяй Украіны зьбілі 58 ударных дронаў.
«Шэсьць бесьпілётнікаў выйшлі з падкантрольнай паветранай прасторы Ўкраіны, паляцеўшы ў напрамку Расеі, Беларусі і часова акупаванай Луганшчыны. Яшчэ тры варожых БПЛА лякацыйна страчаныя на тэрыторыі Ўкраіны (верагодна ўпалі пад уплывам сродкаў РЭБ)», — гаворыцца ў паведамленьні.
Колькі з гэтых дронаў у выніку заляцелі на тэрыторыю Беларусі, не ўдакладняецца.
Праект маніторынгу ваеннай актыўнасьці «Беларускі Гаюн» сьцьвярджае, што ў ноч з 6 на 7 верасьня ў паветраную прастору Беларусі агулам заляцелі 4 расейскія дроны «Шахед». Паводле зьвестак праекту, першы дрон каля 23.20 зайшоў на тэрыторыю Гомельскай вобласьці з Чарнігаўшчыны і «прайшоў праз Лоеў», другі — каля 2.45, таксама з Чарнігаўскай заляцеў у Гомельскую вобласьць, праз Лоеў, і працягнуў рух на паўночны захад курсам на Васілевічы, трэці зайшоў у Беларусь каля 3.10 і трымаў курс у напрамку Мазыра, чацьвётры — заляцеў у 3.38 у раёне Лоева і «рухаўся курсам на захад».
Паводле Паветраных сіл Ўкраіны, у ноч на 7 верасьня ўкраінская супрацьпаветраная абарона працавала ў 11 абласьцях — Віньніцкай, Ровенскай, Хмяльніцкай, Кіеўскай, Кіраваградзкай, Мікалаеўскай, Чарнігаўскай, Чаркаскай, Сумскай, Херсонскай і Палтаўскай.
Раніцай 7 верасьня Расея атакавала дронамі Кіеў. Усе яны былі зьнішчаныя. Абломкі зьбітых дронаў выявілі ў чатырох месцах украінскай сталіцы, паведаміў кіраўнік кіеўскай адміністрацыі Сяргей Папко, у тым ліку — у двары жылога дома. Таксама абломкі расейскіх дронаў упалі ўцэнтры Кіева каля будынка Вярхоўнай рады Ўкраіны.
Паводле папярэдніх зьвестак, пацярпелых і разбурэньняў няма. У выніку падзеньня абломкаў дрона ўзьнік пажар плошчай 50 квадратных мэтраў на адкрытай мясцовасьці ў Пячорскім раёне Кіева. Яго апэратыўна патушылі.
Таксама расейскае войска 7 верасьня абстраляла з артылерыі горад Канстанцінаўка ў Краматорскім раёне Данецкай вобласьці. У выніку абстрэлу загінулі трое мужчын ва ўзросце ад 24-х да 69 гадоў, яшчэ тры чалавекі атрымалі раненьні, паведаміў кіраўнік Данецкай абласной ваеннай адміністрацыі Сяргей Філашкін.
У Канстанцінаўцы пашкоджаны шматпавярховік, адзін адміністрацыйны будынак, крама, аптэка, 6 аўтамабіляў і 3 лініі электраперадачы.
Над Украінай працягваюць лётаць расейскія ўдарныя бесьпілётнікі. Паветраную трывогу аб’яўлялі ў васьмі рэгіёнах.
- Расея пачала поўнамаштабнае ўварваньне ва Ўкраіну 24 лютага 2022 году. Паводлезьвестак ААН, за два гады вайны ва Ўкраіне былі забітыя больш за дзесяць тысяч чалавек, параненыя амаль дваццаць тысяч. Таксама ААН задакумэнтавала пакараньні, выкраданьні, катаваньні, жорсткае абыходжаньне і адвольныя затрыманьні мірных жыхароў расейскімі вайскоўцамі. Расейскія вайскоўцы рэгулярна атакуюць украінскія рэжіёны з розных відаў узбраеньня.
- Кіраўніцтва Расеі адмаўляе, што расейскае войска падчас поўнамаштабнай вайны наносіць мэтанакіраваныя ўдары па грамадзянскай інфраструктуры гарадоў і вёсак Украіны, забіваючы цывільнае насельніцтва і разбураючы бальніцы, школы, дзіцячыя сады, аб’екты энэргетыкі і водазабесьпячэньня.
- Украінскія ўлады і міжнародныя арганізацыі кваліфікуюць гэтыя ўдары як ваенныя злачынствы Расеі і падкрэсьліваюць, што яны маюць мэтанакіраваны характар.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум