Паводле судовай статыстыкі, у першым паўгодзьдзі 2024 году ў Беларусі асудзілі 353 непаўналетніх, што на 27,9% больш, чым у 1-ым паўгодзьдзі 2023 году (276 непаўналетніх), паведамляе прэс-служба Вярхоўнага суда Беларусі. Сярод іх ёсьць і асуджаныя паводле «палітычных» артыкулаў.
Сярод асуджаных паводле артыкулаў, якія ўлады, паводле праваабаронцаў, найчасьцей выкарыстоўваюць для перасьледу грамадзян з палітычных матываў:
- 9 непаўналетніх асудзілі за «арганізацыю і падрыхтоўку дзеяньняў, якія груба парушаюць грамадзкі парадак або актыўны ўдзел у іх» (арт. 342 КК),
- 2 — за «распальваньне расавай, нацыянальнай, рэлігійнай або іншай сацыяльнай варожасьці і варажнечы» (арт. 130 КК),
- 2 — за супраціў сілавікам (арт. 363 КК),
- 1 — за абразу Лукашэнкі (арт. 368 КК),
- 1 — за гвалт або пагрозу гвалту ў дачыненьні да службовай асобы (арт. 366 КК),
- 1 — за масавыя беспарадкі (арт. 293 КК).
Таксама 69 непаўналетніх асудзілі за хуліганства (арт. 339 КК), 5 — за апаганьваньне збудаваньняў і псаваньне маёмасьці (арт. 341 КК) 1 — за незаконныя дзеяньні ў дачыненьні да агнястрэльнай зброі, боепрыпасаў і выбуховых рэчываў (арт. 295 КК) — гэтыя артыкулы ўлады, сярод іншага, раней таксама выкарыстоўвалі для перасьледу паводле палітычных матываў, але ня толькі.
Паводле наркатычных артыкулаў за студзень-чэрвень 2024 году ў Беларусі асудзілі 36 непаўналетніх (арт. 327-332 КК), што на 23,4% менш, чым у 1 паўгодзьдзі 2023 году (47 чалавек).
За злачынствы супраць жыцьця і здароўя асудзілі 15 непаўналетніх, зь іх траіх — за забойства, астатніх — за наўмыснае прычыненьне цялесных пашкоджаньняў рознай ступені цяжкасьці.
За злачынствы супраць уласнасьці асудзілі 156 непаўналетніх, зь іх 80 — за крадзеж, 20 — за махлярства, 17 — за рабаваньне, 17 — за крадзеж шляхам мадыфікацыі кампутарнай інфармацыі, 15 — за ўгон транспарту, 4 — за разбой, 2 — за наўмыснае зьнішчэньне або пашкоджаньне чужой маёмасьці, 1 — за яе прысваеньне або растрату. 23 непаўналетніх асудзілі за незаконны абарот сродкаў плацяжу.
6 непаўналетніх асудзілі за згвалтаваньне, 7 — за гвалтоўныя дзеяньні сэксуальнага характару; 6 — за выраб і распаўсюд парнаграфічных матэрыялаў ці прадметаў парнаграфічнага характару, 9 — за выраб і распаўсюд парнаграфіі з выявай непаўналетняга.
Дваіх падлеткаў асудзілі за заведама ілжывае паведамленьне аб небясьпецы, аднаго — за загадзя ілжывы данос.
З 353 асуджаных за студзень-чэрвень 2024 году
- 104 прызначылі пакараньне ў выглядзе абмежаваньня волі (29,5%),
- 93 — прымусовыя меры выхаваўчага характару (26,3%),
- 78 прысудзілі розныя тэрміны зьняволеньня (22,1%),
- да 48 ужылі адтэрміноўку выкананьня пакараньня (12,2%),
- 17 — грамадзкія працы (4,8%),
- 6 — адміністрацыйны арышт (1,7%),
- 6 — умоўнае непрымяненьне пакараньня (1,7%),
- 4 — штраф (1,1%),
- 1 — папраўчыя работы (0,3%).
- 1 — вызвалілі ад адбыцьця пакараньня.
Паводле зьвестак праваабаронцаў на пачатак траўня, цяпер за кратамі знаходзяцца сама меней 23 маладзёны, якія былі затрыманыя непаўналетнімі і асуджаныя паводле палітычных матываў.
Форум