Улады заявілі, што скончана расьсьледаваньне завочнай крымінальнай справы супраць сузаснавальніц мінскага стартап-хаба «Імагуру».
Тацяне Марыніч і Анастасіі Хамянковай інкрымінавалі па 9 артыкулаў Крымінальнага кодэксу, перадаюць праваабаронцы са спасылкай на сілавікоў.
Паводле сьледзтва, Марыніч і Хамянкова, у прыватнасьці, маюць дачыненьне да «ўчыненьня шэрагу злачынстваў экстрэмісцкай накіраванасьці». Яны нібыта «стварылі і кіравалі экстрэмісцкім фармаваньнем, на інтэрнэт-рэсурсах якога разьмяшчалі экстрэмісцкія матэрыялы ў падтрымку масавых беспарадкаў, якія праходзілі ў 2020-м годзе».
«Іх асноўная мэта — дыскрэдытацыя канстытуцыйных асноваў Рэспублікі Беларусь, падтрыманьне радыкальнага і пратэставага патэнцыялу, а таксама захоп улады неканстытуцыйным шляхам».
Справу перадалі пракурору для накіраваньня ў суд.
У Беларусі спэцвядзеньне адбываецца ў адносінах некалькіх дзясяткаў чалавек. Гэта вядзеньне ў крымінальнай справе ў дачыненьні абвінавачанага, які знаходзіцца за межамі краіны.
Папраўкі ў Крымінальна-працэсуальны кодэкс, якія даюць магчымасьць завочна праводзіць сьледзтва і суды над асобамі, якія знаходзяцца за мяжой, а таксама канфіскоўваць іх маёмасьць, набылі моц 27 ліпеня 2023 году.
У сакавіку 2021 году ў менскі офіс «Імагуру» штурмавалі сілавікі ў масках, якія затрымалі некалькі дзясяткаў удзельнікаў устаноўчай канфэрэнцыі Лігі студэнцкіх аб’яднаньняў. Пасьля гэтага дзейнасьць бізнэс-прасторы ў Беларусі давялося згарнуць, а маёмасьць перадаць на дабрачынныя мэты.
Цяпер арганізацыя працуе за мяжой.
Заснавальніца «Імагуру» Тацяна Марыніч пасьля сьмерці свайго мужа, былога міністра замежнаэканамічных сувязяў і дыплямата Міхаіла Марыніча, выехала ў Гішпанію.
Форум