Расейскія войскі пачалі ўварваньне з выкарыстаньнем бронетэхнікі раніцай у пятніцу. Міністэрства абароны Расеі паведаміла на брыфінгу, што яе войскі занялі вёскі Пляценёўка, Агірцава, Барысаўка, Пільна і Стрылеча на мяжы з Белгародзкай вобласьцю.
Аднак кіраўнік Харкаўскай абласной ваеннай адміністрацыі Алег Сінягубаў заявіў, што на тэрыторыі ўсіх пяці прымежных вёсак яшчэ працягваюцца актыўныя баявыя дзеяньні.
Чыноўнік заявіў, што непасрэднай небясьпекі для другога па велічыні горада Украіны – Харкава няма і «няма ніякіх падстаў» пачынаць эвакуацыю прыкладна 1,3 мільёна харкаўчан, якія працягваюць жыць у горадзе, нягледзячы на рэгулярныя ўдары ракеты і бесьпілётнікаў.
«На дадзены момант супернік працягвае насядаць на поўнач нашай вобласьці, – сказаў ён на прэс-канфэрэнцыі. – Нашы сілы адбілі дзевяць нападаў». Кіеў тэрмінова накіраваў падмацаваньні, каб справіцца з уварваньнем.
Форум