«Мы супраць таго, каб крызіс выкарыстоўваўся для ўскладаньня адказнасьці на трэцюю краіну, пагаршэньня яе іміджу і правакаваньня новай халоднай вайны», — сказаў Сі. Кітайскі лідэр падкрэсьліў, што Пэкін ня быў крыніцай гэтага канфлікту, не падтрымлівае ў ім нічыёй пазыцыі і не зьяўляецца яго ўдзельнікам.
Прэзыдэнт Францыі Эманюэль Макрон сумесна з кіраўніцай Эўракамісіі Урзуляй фон дэр Ляен, якая прысутнічала на частцы перамоваў зь Сі Цзіньпінам у Парыжы, заклікалі кіраўніка КНР выкарыстаць свой уплыў на Маскву, каб пакласьці канец вайне Расеі супраць Украіны.
Пазьней у траўні Сі будзе прымаць у Пэкіне расейскага прэзыдэнта Ўладзіміра Пуціна. На перамовах у Парыжы кіраўнік КНР, аднак, ня выказаў ніякіх дакладных намераў наконт ціску Пэкіну на Маскву. Сі Цзіньпін абмежаваўся толькі агульным пажаданьнем міру, адзначае The New York Times.
У ходзе перамоваў Макрон таксама заклікаў Сі Цзіньпіна не дапускаць экспарту якіх-небудзь тэхналёгій, якія могуць быць выкарыстаныя Расеяй у ходзе яе ўварваньня ва Ўкраіну. Заходнія лідэры занепакоеныя тым, што Кітай, нягледзячы на яго афіцыйную пазыцыю нэўтралітэту ў адносінах да падзей ва Ўкраіне, можа істотна падтрымліваць Расею, пастаўляючы ёй абсталяваньне, прыдатнае для вытворчасьці зброі.
Эманюэль Макрон, які ня раз дапускаў магчымасьць адпраўкі заходніх войскаў ва Ўкраіну, запэўніў Сі Цзіньпіна, што Францыя не знаходзіцца ў стане вайны з Расеяй або зь яе народам і не імкнецца зрынуць урад Пуціна. Пры гэтым, як сказаў Макрон, безь бясьпекі Ўкраіны ня можа быць бясьпекі Эўропы. Францускі прэзыдэнт, гаворачы пра вайну ва Ўкраіне, якая працягваецца, падкрэсьліў важнасьць падтрыманьня цеснага дыялёгу паміж Парыжам і Пэкінам.
На прэсавай канфэрэнцыі ў Парыжы Сі Цзіньпін заявіў, што Кітай адыгрывае актыўную ролю ў дасягненьні міру ва Ўкраіне. Ён зазначыў, што Пэкін выступае «за правядзеньне ў належны час міжнароднай мірнай канфэрэнцыі, прызнанай як Расеяй, так і Ўкраінай і якая забясьпечвае роўны ўдзел усіх бакоў і справядлівае абмеркаваньне ўсіх мірных плянаў». «Гісторыя зноў і зноў даказвае, што ў канчатковым выніку канфлікты можна вырашыць толькі мірным шляхам», — дадаў кіраўнік КНР.
Сі таксама сказаў, што яго краіна гатовая працаваць з Францыяй над глябальным спыненьнем войнаў на час маючых адбыцца Алімпійскіх гульняў у Парыжы.
- У красавіку ў інтэрвію францускаму каналу BFM наконт маючай адбыцца Алімпіяды ў Парыжы Макрон сказаў, што спадзяецца на ўсталяваньне так званага алімпійскага перамір’я ў дні правядзеньня гульняў, з 26 ліпеня па 11 жніўня. Па словах Макрона, падчас гульняў павінна быць абвешчана замірэньне ў вайне ва Ўкраіне, а таксама ў іншых буйнамаштабных канфліктах, у прыватнасьці ў сэктары Газа і Судане. Францускі лідэр тады адзначаў, што імкнецца «прыцягнуць многіх партнэраў» для дасягненьня гэтай мэты, сярод іх ён згадаў старшыню КНР Сі Цзіньпіна.
- У рамках цяперашняй паездкі па Эўропе, першай для яго за пяць гадоў, Сі Цзіньпін наведвае таксама Сэрбію і Вугоршчыну, якія лічацца аднымі з краін Эўропы, якія найбольш сымпатызуюць Расеі. У Францыі адной з галоўных тэм абмеркаваньняў было зніжэньне напружанасьці ў гандлёвых адносінах паміж Кітаем і ЭЗ.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум