Міжнародныя журналісцкія арганізацыі запатрабавалі ад Сэрбіі вызваліць беларуса Андрэя Гнёта

Пра зварот паведаміў Міжнародны інстытут прэсы.

Акрамя згаданага інстытуту, адпаведны зварот падпісалі Беларуская асацыяцыя журналістаў (БАЖ), Эўрапейская фэдэрацыя журналістаў, Эўрапейскі цэнтар свабоды прэсы і СМІ, іншыя арганізацыі.

«Некалькі тыдняў вялася падрыхтоўка да гэтай заявы, але выпадак з Андрэем Гнётам даўно знаходзіцца пад увагай журналісцкіх арганізацый, — паведаміў „Позірку“ намесьнік старшыні БАЖ Барыс Гарэцкі. — Незалежная асацыяцыя журналістаў Сэрбіі, якая сочыць за судом, таксама выказвае асьцярогі, што ўлады могуць сапраўды выдаць беларуса».

Гарэцкі адзначыў, што менавіта з гэтай прычыны журналісцкая супольнасьць і БАЖ вырашылі рабіць больш сумесных намаганьняў і «зрабіць усё на міжнародным узроўні, каб ня выдаць грамадзяніна Беларусі дыктатарскаму рэжыму Аляксандра Лукашэнкі».

«Гнёт — відэограф, відэавытворца, ён безумоўна падпадае пад фармат БАЖ, да таго ж рэдакцыя Current Time накіроўвала ў сэрбскі суд ліст пра тое, што ён супрацоўнічаў з мэдыя і можа праз гэтае супрацоўніцтва лічыцца яго супрацоўнікам», — падкрэсьліў Гарэцкі.

ГЛЯДЗІЦЕ ТАКСАМА:

Беларускага рэжысэра Гнёта пакінулі пад вартай да вынясеньня рашэньня суду аб яго экстрадыцыі з Сэрбіі

Перасьлед Андрэя Гнёта

• Андрэя Гнёта арыштавалі ўлады Сэрбіі, калі ён прызямліўся ў аэрапорце Бялграду ў кастрычніку 2023 году, на падставе ордэру Інтэрполу, выдадзенага на запыт Беларусі. З таго часу ён у Бялградзе пад вартай.
• Гнёт ня ведаў, што на яго выпісаны ордэр, у Сэрбію ён прыехаў на працу. Ён жыў у Тайляндзе, куды ўцёк пасьля ўдзелу ў пратэстах пасьля прэзыдэнцкіх выбараў 2020 году.
• У Беларусі Андрэя Гнёта вінавацяць ва ўхіленьні ад выплаты падаткаў. Сам Гнёт гэта адмаўляе, лічачы, што рэжым Аляксандра Лукашэнкі перасьледуе яго за палітычную дзейнасьць.
• У сьнежні 2023 году суд першай інстанцыі ў Сэрбіі ўхваліў дэпартацыю Гнёта ў Беларусь, але 12 сакавіка 2024 году Апэляцыйны суд у Бялградзе адмяніў рашэньне і адправіў справу на перагляд.
• У канцы лютага Інтэрпол заблякаваў зьвесткі Гнёта, пачаўшы праверку падставаў, паводле якіх беларускія ўлады абвясьцілі яго ў вышук.
• Сябры Гнёта адкрылі збор для аплаты паслуг адвакатаў. Справай рэжысэра займаюцца чатыры абаронцы, іх праца працягваецца ўжо пяты месяц.

ГЛЯДЗІЦЕ ТАКСАМА:

Беларусы Варшавы патрабавалі свабоды для Андрэя Гнёта, які ўжо 5 месяцаў у сэрбскай турме