Расея ў ноч на 11 красавіка атакавала энэргетычныя аб’екты ў пяці Ўкраіны — Кіеўскай, Львоўскай, Запароскай, Адэскай і Харкаўскай.
Геаграфія расейскай тэрыторыі, якую атакуюць дронамі, таксама павялічылася.
У Адэскай і Харкаўскай абласьцях ёсьць загінулыя
Расейцы пачалі атакаваць Адэскую вобласьць зь вечара 10 красавіка. Як паведамілі абласныя ўлады, у выніку абстрэлу балістычнымі ракетамі пацярпела транспартная інфраструктура, пяць чалавек загінулі, у тым ліку 10-гадовая дзяўчынка, яшчэ 14 атрымалі раненьні. За жыцьцё чацьвярых зь іх цяпер змагаюцца лекары. Уначы расейцы ўдарылі дронамі. Іхныя аскепкі трапілі ў энэргетычны аб’ект і выклікалі пажар.
У Харкаве ад пацэльваньня ракетамі С-300 таксама пацярпеў энэргетычны аб’ект. За содні ў Харкаўскай вобласьці ў выніку абстрэлаў загінулі два чалавекі і чатыры атрымалі раненьні.
Для абстрэлу Львоўскай вобласьці расейскія войскі выкарысталі адначасова бесьпілётнікі і ракеты. У выніку пашкоджаныя газаразьмеркавальная станцыя ў Стрыйскім раёне і электрападстанцыя ў Чырвонаградзкім.
З тактычнай авіяцыі расейцы атакавалі і Запароскую вобласьць. Супрацьпаветранай абароне ўдалося зьнішчыць дзьве ракеты, але іншыя пацэлілі ў энэргетычны аб’ект.
Ад адначасовага абстрэлу ракетамі і дронамі пацярпела і Кіеўская вобласьць. Паветраная трывога працягвалася больш за 5 гадзін. Пашкоджаньні атрымаў аб’ект крытычнай інфраструктуры.
Улады сьцьвярджаюць, што ў Кіеўскай, Запароскай і Львоўскай інфармацыі аб параненых ці загінулых не атрымлівалі.
Паводле нацыянальнай энэргетычнай кампаніі «Укренерго», пашкоджаньні атрымалі падстанцыі і аб’екты генэрацыі электраэнэргіі. Аднак аварыйныя адключэньні закранулі толькі Харкаўскую вобласьць.
У апэратыўным камандаваньні Паветраных сіл Украіны паведамілі, што Расея атакавала 42 ракетамі і 40 ударнымі дронамі. Сродкі супрацьпаветранай абароны Ўкраіны зьбілі 18 ракет і 39 бесьпілётнікаў.
Пазьней ва Ўкраіне паведамілі, што ў выніку ракетнай атакі расейцы цалкам зьнішчылі Трыпольскую ЦЭС. Гэта была наймагутнейшая цеплаэлектрастанцыя ў Кіеўскай вобласьці, якая забясьпечвала электраэнэргіяй тры вобласьці — Чаркаскую, Жытомірскую і Кіеўскую.
Трыпольская ЦЭС стала трэцяй пасьля Зьмеяўскай ЦЭС у Харкаўскай вобласьці і Вуглягорскай ЦЭС у Данецкай вобласьці, зьнішчаных расейцамі з пачатку поўнамаштабнай вайны супраць Украіну.
Кіраўніцтва кампаніі – апэратара ЦЭС паведаміла, што супрацоўнікі цеплаэлектрастанцыі не пацярпелі.
У Расеі шэсьць рэгіёнаў пацярпелі ад атакі дронамі
У Міністэрстве абароны Расеі паведамілі, што ў ноч на 11 красавіка перахапілі і зьнішчылі 12 «украінскіх бесьпілётнікаў»: па тры — над Тамбоўскай і Курскай абласьцямі, па два — над Белгарадзкай вобласьцю і Рэспублікай Мардовіі, па адным — над Бранскай і Ліпецкай абласьцямі.
У той жа час расейскія ўлады не ўдакладняюць маштабы наступстваў. Ва ўкраінскіх Telegram-каналах сьцьвярджаюць, што ў Курскай вобласьці пашкоджаньні атрымаў Міхайлаўскі горна-ўзбагачальны камбінат.
Пазьней губэрнатар Курскай вобласьці Раман Старавойт паведаміў, што камбінат не пацярпеў, але на паркоўцы былі зьнішчаныя прыватныя аўтамабілі супрацоўнікаў камбінату.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
