Нацыянальны банк Беларусі апублікаваў статыстыку замежнага гандлю краіны таварамі і паслугамі ў студзені-лютым 2024 году, зь якога вынікае, што замежнагандлёвы абарот таварамі і паслугамі склаў 14,9 мільярда даляраў — на 1,3% больш за ўзровень студзеня-лютага 2023 году.
Сальда замежнага гандлю таварамі і паслугамі склалася станоўчым — 23,1 мільёна даляраў супраць 126,6 мільёна даляраў у студзені-лютым 2023 году.
У першыя два месяцы 2024 году Беларусь экспартавала тавараў на 6,2 мільярда даляраў супраць 6 мільярдаў даляраў у аналягічны пэрыяд мінулага году, а імпартавала тавараў на 6,6 мільярда даляраў супраць 6,4 мільярда даляраў летась. Сальда ў гандлі таварамі склалася адмоўным і дасягнула мінус 399,2 мільёна даляраў у параўнаньні зь леташнім на ўзроўні мінус 342,5 мільёнаў даляраў.
Сёлета ў студзені-лютым Беларусь экспартавала паслуг на 1,273 мільярда даляраў, што на 3,9% менш аналягічнага пэрыяду мінулага году, а імпартавала — на 851,3 мільёна даляраў, што на 0,6% менш леташняга ўзроўню. Сальда ў гандлі паслугамі склалася станоўчым у памеры 422,3 мільёна даляраў супраць леташняга ўзроўню ў 469,1 мільёна даляраў.
