Больш за 300 дэпутатаў Эўрапейскага Парлямэнту падпісалі паштоўкі для беларускіх палітвязьняў, паведаміла дэмакратычная лідэрка Беларусі Сьвятлана Ціханоўская на сваёй старонцы ў сацыяльнай сетцы Х.
Ціханоўская напісала, што «поўніцца ўдзячнасьцю» да іх і адзначыла, што такі «выдатны акт салідарнасьці дае надзею і зараджае энэргіяй для барацьбы з гэтай несправядлівасьцю».
«На карту пастаўленыя жыцьці людзей, і мы ня можам спыніцца, пакуль усе ня будуць вызваленыя», — напісала Ціханоўская.
Акцыя салідарнасьці зь беларускімі палітвязьнямі праходзіць у рамках ініцыятывы #EPstandsBYyou 11–14 сакавіка на пленарнай сэсіі Эўрапарлямэнту ў Страсбургу (Францыя).
Ціханоўская адзначыла, што аднаўленьне гэтай ініцыятывы стала вынікам яе нядаўняй сустрэчы з прэзыдэнткай Эўрапарлямэнту Рабэртай Мэтсалай, і выказала ўпэўненасьць, што #EPstandsBYyou падштурхне палітыкаў па ўсёй Эўропе далучыцца да барацьбы за свабоду беларускіх палітвязьняў.
На 14 сакавіка ў Беларусі налічваюцца 1 412 чалавек, якіх прызнае палітвязьнямі праваабарончая супольнасьць, аднак рэальная колькасьць людзей, якія зазналі палітычныя рэпрэсіі, у тым ліку зьняволеньне, значна большая.
