СК распачаў завочнае крымінальнае вядзеньне супраць чальца каманды Бабарыкі Івана Краўцова

Пра гэта паведамляе партал «Люстэрка» са спасылкай на прэсавую службу СК.

Краўцову інкрымінуюцца наступныя артыкулы Крымінальнага кодэксу:

• ч. 3 арт. 130 (Наўмысныя дзеяньні, накіраваныя на ўзбуджэньне сацыяльнай варожасьці, варожасьці паводле прыкметы іншай сацыяльнай прыналежнасьці, учыненыя арганізаванай групай, якія пацягнулі за сабой іншыя цяжкія наступствы);
• ч. 4 арт. 209 (Завалоданьне маёмасьцю шляхам падману і злоўжываньня даверам (махлярства), учыненае ў асабліва буйным памеры);
• ч. 1 арт. 357 (Змова, учыненая з мэтай захопу дзяржаўнай улады неканстытуцыйным шляхам);
• ч. 1 арт. 3611 (Стварэньне экстрэмісцкага фармаваньня).

ГЛЯДЗІЦЕ ТАКСАМА:

«Ідзе пасыл пачаць дыялёг з рэжымам». Павал Латушка і Іван Краўцоў аб канфлікце ўнутры Каардынацыйнай рады

Што такое спэцыяльнае вядзеньне

Як тлумачаць на сайце СК, «спэцыяльнае вядзеньне — вядзеньне па крымінальнай справе ў дачыненьні да абвінавачанага, які знаходзіцца па-за межамі Рэспублікі Беларусь і ўхіляецца ад яўкі ў орган, які вядзе крымінальны працэс». Гэта значыць, спэцвядзеньне — фактычна першы крок да нядаўна ўзаконеных у Беларусі завочных судоў над тымі, хто знаходзіцца за мяжой.

Разам з абвесткай аб адкрыцьці спэцыяльнага вядзеньня СК выклікае фігурантаў у Беларусь для правядзеньня сьледчых дзеяньняў — публікацыя гэтай інфармацыі на сайце ведамства па цяперашнім законе лічыцца належным апавяшчэньнем.

ГЛЯДЗІЦЕ ТАКСАМА:

Вынеслі прысуды ў завочнай «справе Каардынацыйнай рады», у тым ліку Ціханоўскай, якая цяпер зь візытам у Лёндане

Аляксандар Лукашэнка ў ліпені 2022 году падпісаў закон аб зьменах у Крымінальна-працэсуальны кодэкс, якія дазваляюць судзіць беларусаў, якія знаходзяцца за мяжой, завочна і нават прыгаворваць іх да расстрэлу.

Як паказала практыка, правядзеньне папярэдняга расьсьледаваньня ў парадку спэцвядзеньня займае няшмат часу.