У судзе Ленінскага раёну Менску 28 сьнежня за ўдзел у маршы пратэсту ў 2020 годзе паводле ч. 1 арт. 342 Крымінальнага кодэксу асудзілі бармэнку Маргарыту Ермаліцкую. Справу разглядала судзьдзя Юлія Шчоткіна.
Маргарыту апазналі па фатаздымках, разьмешчаных на адным з сайтаў, і затрымалі зусім нядаўна – 7 сьнежня 2023 году.
На выстаўленых у судзе для агляду фатаздымках абвінавачаная апазнала сябе.
Суд прызначыў ёй 2 гады і 6 месяцаў абмежаваньня волі без накіраваньня ў папраўчую ўстанову адкрытага тыпу («хатняя хімія»).
У Берасьці мужчыну асудзілі за камэнтар
12 і 15 студзеня суд Маскоўскага раёну Берасьця разглядаў справу супраць Аляксандра Хведарука. Яго абвінавацілі паводле арт. 369 Крымінальнага кодэксу («Абраза прадстаўніка ўлады»). Судзьдзёй у справе была Марыя Аліфярук.
Паводле вэрсіі абвінавачаньня, Хведарук пакінуў камэнтар пад відэа Акадэміі МУС, якое 5 лістапада 2022 году са сваім подпісам апублікаваў тэлеграм-канал «Беларусь за МКАДам». На ім выкладчыцы і курсанткі Акадэміі чытаюць верш Кацярыны Даўлатавай «Мужчынам няпроста».
Згодна з вэрсіяй абвінавачаньня, у сваім камэнтары Аляксандар публічна абразіў жанчын. Дзьве выкладчыцы з роліка падалі да Хведарука пазоў «аб кампэнсацыі маральнай шкоды» па 2000 рублёў кожная.
Пракурор прапанаваў пакараць Аляксандра Хведарука двума гадамі абмежаваньня волі з накіраваньнем у ПУАТ («хіміяй»). А таксама штрафам у памеры 50 базавых велічынь. Прысуд пакуль не вядомы праваабаронцам.
