З кастрычніка мінулага году ізраільскае войска праводзіць у Газе ваенную апэрацыю супраць палестынскай радыкальнай групоўкі ХАМАС, прызнанай тэрарыстычнай у ЗША і Эўразьвязе. Падчас ваенных дзеяньняў загінулі тысячы палестынцаў.
Падставай для ваенных дзеяньняў у Газе стаў напад джыхадыстаў на поўдзень Ізраілю 7 кастрычніка. Загінулі больш за 1400 чалавек. Больш за 200 чалавек былі выкрадзеныя і вывезеныя ў Газу. Частку закладнікаў — у асноўным жанчын і дзяцей — пасьля вызвалілі ў абмен на палестынскіх зьняволеных у Ізраілі. Паводле апошніх зьвестак, ХАМАС па-ранейшаму трымае ў Газе больш за 100 закладнікаў.
Паводле зьвестак падкантрольнага ХАМАС Міністэрства аховы здароўя Газы, праз ізраільскія напады ў сэктары загінулі больш за 23 тысячы палестынцаў, большасьць зь якіх — жанчыны і дзеці. Многія краіны абвінавачваюць Ізраіль у жорсткасьці. Ізраільскае войска ўскладае адказнасьць за гібель мірных жыхароў на ХАМАС. Ізраільскія вайскоўцы сьцьвярджаюць, што джыхадысты разьмяшчаюць сваю інфраструктуру сярод цывільных пабудоў і выкарыстоўваюць насельніцтва як жывы шчыт.
Паводле зьвестак ААН, колькасьць змушана перамешчаных асоб у палестынскім анкляве набліжаецца да двух мільёнаў. Гэта больш за 85% насельніцтва сэктару Газа.
Абвінаваўчае заключэньне займае больш за 80 старонак. ПАР імкнецца даказаць, што дзеяньні Ізраілю выходзяць за рамкі самаабароны і носяць прыкметы генацыду. У прыватнасьці, пазоўнікі адзначаюць вялікую колькасьць загінулых палестынцаў, прымусовае перамяшчэньне, спыненьне паставак харчаваньня, абмежаваньне нараджальнасьці ў сувязі з аблогай бальніц.
ПАР мае намер дамагацца ад суду прыняцьця пастановы, якая абавяжа Ізраіль неадкладна спыніць баявыя дзеяньні.
Выступ прадстаўнікоў Ізраілю заплянаваны на пятніцу, 12 студзеня.
У першы дзень судовага працэсу ў Гаазе сотні чалавек з ізраільскімі сьцягамі і партрэтамі закладнікаў выйшлі на вуліцы гораду і рушылі ў бок суду.
Прапалестынскія актывісты таксама праводзяць дэманстрацыю. Удзельнікі трымаюць плякаты з заклікамі спыніць забойствы ў сэктары Газа.
За акцыямі сочаць сотні паліцыянтаў. Зь серады ў Гаазе ўзмоцненыя меры бясьпекі.
