У рэзалюцыі, якую прапанавала Масква, няма згадкі радыкальнага ісламісцкага руху ХАМАС, які ўчыніў напад на Ізраіль 7 кастрычніка.
Толькі чатыры краіны прагаласавалі разам з Расеяй за прапанаваны тэкст. Яшчэ чацьвёра, у тым ліку ЗША, прагаласавалі супраць, а шасьцёра ўстрымаліся, паведамляе «Голас Амэрыкі».
Пастаянны прадстаўнік Ізраілю пры ААН Гілад Эрдан заявіў, што Рада Бясьпекі, якая не прымала рэзалюцый аб сытуацыі ў Ізраілі і на палестынскіх тэрыторыях з 2016 году, знаходзіцца на «адным з самых важных раздарожжаў» з моманту свайго заснаваньня пасьля Другой сусьветнай вайны.
«Ці падтрымае Рада барацьбу за цывілізацыю? Ці яна будзе стымуляваць генацыд джыхадыстаў, якія імкнуцца забіць усіх няверных? Для органа, які займаецца пытаньнямі бясьпекі, гэта нават не павінна быць пытаньнем. Першы крок, які павінен зрабіць гэтая рада, перш чым заклікаць да дапамогі, спакою ці стрыманасьці, — абвясьціць ХАМАС крывавай тэрарыстычнай арганізацыяй, якой ён і зьяўляецца».
Пастаянны прадстаўнік Палестынскай аўтаноміі пры ААН Рыяд Мансур заявіў, што ў Рады Бясьпекі ёсьць маральны абавязак дзейнічаць у спробе стрымаць ізраільскі напад на сэктар Газа, які, паводле яго, «забірае 12 жыцьцяў кожную гадзіну». Ён назваў дзеяньні Ізраілю «паўнавартасным наступам на палестынскі народ», а не наземнай апэрацыяй, як заяўляюць у Тэль-Авіве.
Размова Нэтаньягу з Пуціным
Канцылярыя кіраўніка ўраду Ізраілю 17 кастрычніка распаўсюдзіла паведамленьне пра яго перамовы з прэзыдэнтам Расеі:
«Увечары 16 кастрычніка адбылася тэлефонная размова прэм’ер-міністра Біньяміна Нэтаньягу з прэзыдэнтам Расеі Ўладзімірам Пуціным. Прэм’ер-міністар растлумачыў, што Ізраіль, зазнаўшы нападу гнюсных і жорсткіх забойцаў, уступіў у вайну, поўны рашучасьці і яднаньня, і ня спыніцца, пакуль ня зьнішчыць ваенны і адміністрацыйны патэнцыял ХАМАСу».
Вайна Ізраілю з ХАМАСам. Асноўнае
- 7 кастрычніка 2023 году Ізраіль зазнаў ракетны ўдар з боку сэктару Газа, а баевікі руху ХАМАС прарваліся на тэрыторыю краіны, забіўшы ня менш за 260 удзельнікаў музычнага фэстывалю і захапіўшы сотні закладнікаў. Некаторых людзей расстрэльвалі проста на вуліцах.
- Уварваньне з сэктару Газа адбылося ў 50-ю гадавіну пачатку вайны Суднага дня 1973 году.
- Армія абароны Ізраілю (ЦАХАЛ) у адказ на атаку пачала ваенную апэрацыю «Жалезныя мячы». Ужо 8 кастрычніка Ізраіль афіцыйна абвясьціў стан вайны.
- ХАМАС папярэдзіў, што будзе забіваць аднаго з закладнікаў кожны раз, калі ізраільскія вайскоўцы будуць бамбіць цывільныя аб’екты ў Газе.
- Іран заявіў, што не бярэ ўдзелу ў вайне, але адкрыта заявіў пра падтрымку дзеяньняў ХАМАС. Найвышэйшы ўладар Ірану аятала Алі Хамэнэі заявіў: «Мы цалуем рукі тым, хто плянаваў напад на сыянісцкі рэжым».
- Колькасьць параненых беларусаў на 10 кастрычніка 2023 году — 3 чалавекі. Стан адной з параненых жанчын цяжкі.
- 10 кастрычніка ў кібуцы Кфар Аза побач з сэктарам Газа выявілі целы дзясяткаў забітых, у тым ліку малых дзяцей.
- Міністар абароны Ізраілю Яаў Галант 11 кастрычніка заявіў, што войска пераходзіць да поўнамаштабнага наступу на сэктар Газа.
- Лібанская ўзброеная групоўка «Хэзбала» 11 кастрычніка абстраляла супрацьтанкавымі ракетамі пазыцыі ізраільскіх вайскоўцаў і заявіла, што забіла і параніла іх.
- Па стане на 17 кастрычніка вядома, што ў Ізраілі з пачатку вайны загінулі трое грамадзян Беларусі.
- Ізраіль у лістападзе 2023 году пайшоў у атаку на сэктар Газа і заявіў аб пашырэньні наземнай апэрацыі.
- 22 лістапада стала вядома, што Ізраіль і ХАМАС у Катары падпісалі пагадненьне аб замірэньні на 4 дні. Пазьней замірэньне падоўжылі, але ўжо 30 лістапада яно спынілася пасьля ракет з Газы па Ізраілі, заявілі ў ЦАХАЛ.
- За час замірэньня з палону ХАМАС было вызвалена 105 закладнікаў, а з ізраільскіх турмаў 240 палестынскіх зьняволеных.
- 6 студзеня Ізраіль заявіў пра тое, што поўнач сэктару Газа зачышчаная ад баевікоў ХАМАС.
«Хэзбала» выпусьціла ракеты па Ізраілі на наступны дзень пасьля нападу ХАМАС, у кастрычніку 2023 году. З таго часу абстрэлы на мяжы адбываюцца амаль штодня. Дзясяткі тысяч жыхароў эвакуавалі з прымежных раёнаў з абодвух бакоў.
«Хэзбала» — ваенізаваная групоўка і палітычная партыя, якая кантралюе значную частку паўднёвага Лібану. Злучаныя Штаты лічаць яе тэрарыстычнай арганізацыяй. Эўрапейскі Зьвяз унёс у свой сьпіс такіх арганізацыяў толькі яе ўзброенае крыло, але не палітычную партыю (партыя «Хэзбалы» прадстаўлена ў парлямэнце Лібану). «Хэзбала» таксама ёсьць часткаю так званай іранскай «восі супраціву» — сеткі іранскіх давераных асобаў і падтрыманых Тэгеранам групаў баевікоў, якія выступаюць супраць Ізраілю і ЗША. - Увосень 2024 году рэзка вырасла супрацьстаяньне на ізраільска-лібанскай мяжы. «Хэзбала» атакавала Ізраіль, а ў Тэль-Авіве вырашылі правесьці сэрыю авіяналётаў, каб зьнішчыць атакавальны патэнцыял «Хэзбалы».
- 23 верасьня Ізраіль распачаў першую з 2006 году наземную апэрацыю на поўдні Лібану, калі пачалася Другая лібанская вайна (Ліпеньская вайна). Апэрацыю назвалі «Стрэлы поўначы».
- 27 верасьня Ізраіль нанёс магутныя ўдары па Лібане і забіў лідэра «Хэзбалы» Хасана Насралу.
- 3 кастрычніка Армія абароны Ізраілю паведаміла пра атаку на аб’екты «Хэзбалы» ў Бэйруце.
- 15 студзеня 2025 году стала вядома пра пагадненьне пра спыненьне агню паміж Ізраілем і ХАМАС, якое павінна пачаць дзейнічаць з 19 студзеня. Ізраільскі бок выпусьціць некалькіх зьняволеных палестынскіх арабаў, а тэрарыстычная групоўка ізраільскіх закладнікаў.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
