На адным з фатаздымкаў, апублікаваных вайскоўцамі, украінскі сьцяг разьвіваецца над будынкам мясцовай разбуранай школы.
Напярэдадні намесьнік міністра абароны Ўкраіны Ганна Маляр заявіла, што байцы 47-й брыгады з боем увайшлі на тэрыторыю вёскі. Пра поўнае яе ўзяцьце афіцыйна не паведамлялі.
Рабоціна расейскія вайскоўцы ўтрымлівалі з сакавіка 2022 году. Гэта невялікая вёска плошчай каля 3 квадратныя кілямэтраў. Да вайны, паводле афіцыйных зьвестак, там пражывалі менш за 500 чалавек. Аднак ваенныя экспэрты неаднаразова заяўлялі аб важнасьці гэтага населенага пункту, паколькі ён дазваляе кантраляваць аўтадарогу, якая вядзе ў Токмак — буйны лягістычны хаб расейскага войска.
У Мінабароны Расеі інфармацыю пра ўзяцьце Рабоціна Ўзброенымі сіламі Ўкраіны пакуль не камэнтавалі. Шэраг расейскіх тэлеграм-каналаў прызнаюць страту кантролю над сялом.
