Ужо сёньня: дзень памяці мовазнаўцы Яна Станкевіча

Дата дня

16 жніўня 1976 году памёр Ян Станкевіч, беларускі мовазнаўца, гісторык, палітычны дзяяч.

Таксама ў гэты дзень

1941 — у СССР апублікавалі загад, паводле якога чырвонаармейцаў, якія здаліся ў палон, абвяшчалі здраднікамі, а іх сем’і пазбаўлялі дзяржаўнай падтрымкі.

1945 — у Маскве паміж СССР і Польшчай падпісалі дамову аб савецка-польскай мяжы, у аснову якой паклалі «лінію Керзона», прапанаваную яшчэ ў 1919–1920 гадах. Згодна з дамовай, ад Беларусі да Польшчы адышла амаль уся Беластоцкая вобласьць у складзе 17 раёнаў з абласным цэнтрам і 3 раёны Берасьцейскай вобласьці. У межах польскай дзяржавы апынулася значная колькасьць беларускага насельніцтва.

1960 — Кіпр абвешчаны самастойнай дзяржавай.

1995 — большасьць насельніцтва Бэрмудзкіх астравоў на рэфэрэндуме прагаласавалі супраць незалежнасьці і за захаваньне статусу брытанскай калёніі.

У гэты дзень нарадзіліся

1874 ― Аляксандар Уласаў, беларускі грамадзкі дзяяч, рэдактар-выдавец газэты «Наша Ніва», сэнатар у міжваеннай Польскай Рэспубліцы.

1878 ― Дамінік Сямашка, беларускі й літоўскі грамадзка-палітычны дзяяч.

1903 ― Мікола Абрамчык, прэзыдэнт БНР. Такая дата нараджэньня пазначаная ў Энцыкляпэдыі гісторыі Беларусі.​ Паводле іншых зьвестак, ён нарадзіўся 6 жніўня 1903 году.

1935 — Аляксандар Падлужны, беларускі мовазнаўца.

У памяці

1977 ― Элвіс Прэсьлі, амэрыканскі сьпявак, кароль рок-н-ролу.​

1990 ― Язэп Семяжон, беларускі перакладнік і паэт.