«Беларусь і Віетнам маюць шмат супольнага. У нашых народаў падобная гераічная гісторыя. Мы ведаем, што такое барацьба за свабоду і незалежнасьць», — заявіў міністар абароны Рэспублікі Беларусь генэрал-лейтэнант Віктар Хрэнін падчас сустрэчы 15 жніўня ў Маскве зь міністрам нацыянальнай абароны Сацыялістычнай Рэспублікі Віетнам генэралам арміі Фан Ван Зянгам.
Хрэнін адзначыў, што Міністэрства абароны Рэспублікі Беларусь надае асаблівае значэньне разьвіцьцю адносін зь Віетнамам, а міжнароднае ваеннае супрацоўніцтва заўсёды садзейнічала збліжэньню ўзброеных сіл розных дзяржаў.
«Вынікі рэалізаваных сумесных мерапрыемстваў прадэманстравалі гэта на практыцы — гэта і правядзеньне афіцыйных візытаў, узаемадзеяньне ў сфэры ваеннай адукацыі, навуковай дзейнасьці, а таксама супрацоўніцтва ў рамках вэтэранскага руху».
За тры мінулыя дзесяцігодзьдзі з дня ўстанаўленьня дыпляматычных адносін паміж Беларусьсю і Віетнамам дасягнуты значныя посьпехі ў разьвіцьці двухбаковых кантактаў, адзначыў Віктар Хрэнін.
Віктар Хрэнін таксама сустрэўся зь міністрам абароны Расеі Сяргеем Шайгу. Расейскі тэлеканал «Звезда» апублікаваў відэа зь імі, але бяз гуку. Падрабязнасьцяў перамоў няма.
