Пра гэта паведаміў прэзыдэнт Украіны Ўладзімір Зяленскі.
«Данбас, ад якога Расея спрабуе пакінуць толькі разьбітыя і абпаленыя камяні. Два ракетныя ўдары. Цаляньне па звычайным жылым доме. На жаль, ёсьць ахвяры. На месцы — ратавальнікі і ўсе неабходныя службы. Ідзе выратаваньне людзей», — напісаў Зяленскі ў сваім тэлеграм-канале.
Як паведаміў кіраўнік Данецкай абласной вайсковай адміністрацыі Павел Кірыленка, у выніку ракетнага ўдару па Пакроўску, паводле папярэдніх зьвестак, загінуў адзін чалавек, яшчэ сямёра атрымалі раненьні рознай ступені цяжкасьці. Ён удакладніў, што ў выніку атакі пашкоджаныя 5- і 9-павярховыя дамы, жылыя дамы ў прыватным сэктары, гатэль, установы харчаваньня, крамы, адміністрацыйныя будынкі.
У сваю чаргу кіраўнік МУС Украіны Ігар Кліменка паведаміў, што на 21:50 кіеўскага часу колькасьць загінулых вырасла да пяці чалавек, раненьні атрымаў 31 чалавек. Сярод загінулых — намесьнік начальніка ўправы Дзяржаўнай службы надзвычайных сытуацыяў (ДСНС) у Данецкай вобласьці. Раненьні атрымалі 19 паліцыянтаў, пяцёра ратавальнікаў, трое цывільных, у тым ліку дзіця, удакладніў ён.
Гібель супрацоўніка ДСНС пацьвердзіў кіраўнік ведамства Сяргей Крук.
Акрамя таго, увечары 7 жніўня адбыўся авіяналёт на Купянскі раён Харкаўскай вобласьці. Чатыры кіраваныя авіябомбы ўпалі на паселішча Круглякоўка, забіўшы двух чалавек і параніўшы пяцёх, паведаміў кіраўнік Офісу прэзыдэнта Ўкраіны Андрэй Ярмак.
