Валер Цапкала пазбаўлены ордэна ў сувязі з завочнай судзімасьцю. Указ апублікавалі на беларускай мове, што ў часы кіраваньня Лукашэнкі адбываецца надзвычай рэдка.
«У сувязі з асуджэньнем за зьдзяйсьненьне цяжкіх і асабліва цяжкага наўмысных злачынстваў пазбавіць Цапкалу Валерыя Вільямавіча ордэна Пашаны», — гаворыцца ў дакумэнце.
Валер Цапкала атрымаў ордэн Пашаны ў чэрвені 2014 году «за шматгадовую плённую працу, узорнае выкананьне службовых абавязкаў, дасягненьне высокіх вытворчых паказьнікаў, значны асабісты ўнёсак у разьвіцьцё інфармацыйных тэхналёгій».
У красавіку 2023 году Менскі абласны суд завочна прыгаварыў яго да 17 гадоў пазбаўленьня волі ў калёніі ўзмоцненага рэжыму і штрафу ў памеры 1000 базавых велічынь, а таксама пазбавіў права займаць пасады, зьвязаныя з выкананьнем арганізацыйна-распарадчых і адміністрацыйна-гаспадарчых абавязкаў, на працягу 5 гадоў.
Акрамя таго, зь яго павінны спагнаць на карысьць адміністрацыі Парку высокіх тэхналёгій больш за 20,67 тыс. рублёў кампэнсацыі маёмаснай шкоды. На карысьць дзьвюх асоб — па 10 тыс. кампэнсацыі маральнай шкоды кожнаму. У даход дзяржавы павінна быць спагнана больш за 2,433 млн рублёў.
Сам палітык пакінуў краіну ў ліпені 2020 году, баючыся крымінальнага перасьледу. Пазьней да яго ў Латвію пераехала жонка і дзеці.
