Суд у Польшчы палічыў, што былы супрацоўнік ФСБ стварае пагрозу для бясьпекі краіны.
Па словах жонкі Наўрузбекава, якая знаходзіцца ў Польшчы, праваахоўныя органы краіны ня сталі чакаць разгляду судом скаргі на рашэньне аб дэпартацыі, пададзенай яе мужам. Пры гэтым самой Наўрузбекавай і іх дзецям прытулак далі.
Паводле зьвестак тэлеграм-каналу SOTA, пасьля таго, як Эмран Наўрузбекаў быў перададзены расейскаму боку на мяжы з Калінінградзкай вобласьцю, з ім зьнікла сувязь. Адвакатка дэпартаванага Карына Маскаленка лічыць, што ў Расеі яму пагражае сьмерць.
Раней Наўрузбекаў двойчы прасіў палітычнага прытулку ў Польшчы. Атрымаўшы на першае прашэньне адмову, ён абскардзіў яе. З кастрычніка мінулага году былы супрацоўнік ФСБ знаходзіўся ў лягеры для ўцекачоў у Куяўска-Паморскім ваяводзтве на поўначы Польшчы. 17 траўня Наўрузбекаў быў затрыманы. Прычынай стала меркаванае парушэньне ім правілаў паводзінаў у лягеры і непадпарадкаваньне патрабаваньням супрацоўнікаў паліцыі. Затрыманы сваю віну адмаўляў.
