«Рэжым контратэрарыстычнай апэрацыі ў Белгарадзкай вобласьці РФ, уведзены пасьля пранікненьня ў рэгіён узброенай групоўкі з тэрыторыі Ўкраіны, адменены», заявіў губэрнатар вобласьці Вячаслаў Гладкоў.
У Мінабароны РФ заявілі, што расейскія войскі «заблякавалі і разграмілі групы дывэрсантаў, якія ўварваліся на тэрыторыю Белгарадзкай вобласьці». У ведамстве сьцьвярджаюць, што «зьнішчана больш за 70 украінскіх тэрарыстаў, 4 баявыя браняваныя машыны і 5 пікапаў». Пра страты сярод расейскіх вайскоўцаў Мінабароны РФ не паведаміла.
З боку дывэрсантаў ці з боку Ўкраіны гэтую інфармацыю пакуль ніхто не пацьвердзіў. Фатаздымкаў забітых расейскія ўлады таксама не паказалі.
- Рэжым контратэрарыстычнай апэрацыі ў Белгарадзкай вобласьці ўвялі 22 траўня пасьля нападу ўзброеных людзей на некалькі прымежных з Украінай вёсак. Паводле апошніх зьвестак мясцовых уладаў, раненьні атрымалі 12 чалавек, загінулі двое мірных жыхароў.
- Адказнасьць за дывэрсіі ўзялі на сябе прадстаўнікі Рускага добраахвотніцкага корпусу (РДК) і легіёна «Свабода Расеі». Гэтыя фармаваньні, якія ваююць на баку Ўкраіны, як сьцьвярджаецца, складаюцца з расейскіх грамадзян.
- Прадстаўнік Галоўнага ўпраўленьня выведкі Мінабароны Ўкраіны Андрэй Юсаў 22 траўня заявіў, што ідзе апэрацыя па стварэньні «зоны бясьпекі» ў Белгарадзкай вобласьці. Гэта першая падобная заява. Як правіла, украінскія вайскоўцы не камэнтуюць сьцьвярджэньні пра абстрэлы або дывэрсіі на расейскай тэрыторыі.
- Дарадца офісу прэзыдэнта Ўкраіны Міхаіл Падаляк, у сваю чаргу, напісаў, што ў Кіеве «зь цікавасьцю сочаць» за падзеямі, але ня маюць да іх «непасрэднага дачыненьня».
