Тацяну Макляцову, выкладчыцу Віцебскага дзяржаўнага тэхналягічнага ўнівэрсытэту, разам зь яшчэ некалькімі калегамі затрымалі 29 красавіка.
«Наша ніва» з спасылкай на крыніцы ў Віцебску паведамляе, што ў той дзень затрымалі ад шасьці да васьмі супрацоўнікаў ВДТУ. Пакуль суд адбыўся толькі над Тацянай. Судзьдзя Першамайскага раённага суду Віцебску Алена Жук абвінаваціла выкладчыцу паводле двух артыкулаў — 19.11 КаАП і 24.23 КаАП. Па першым артыкуле на жанчыну склалі два пратаколы — за падпіскі на два «экстрэмісцкія» рэсурсы ў фэйсбуку, піша «Віцебская вясна».
Яшчэ адзін пратакол склалі за аватарку, на якой была рамка са словамі Янкі Купалы «Людзьмі звацца». Міліцыянты выказалі прэтэнзіі да белага і чырвонага колераў выявы.
Згодна з судовай пастановай суду, Тацяна Макляцова нібыта такім чынам публічна выказала свае грамадзка-палітычныя інтарэсы. У выніку — штраф разам паводле двух артыкулаў на 60 базавых велічынь (2 200 рублёў).
Калегі расказваюць, што некаторых з затрыманых 29 красавіка адпусьцілі ў той самы дзень пасьля складаньня пратакола, акрамя Тацяны Макляцовай і яшчэ адной супрацоўніцы, 67-гадовай выкладчыцы катэдры дызайну Натальлі Тарабукі. Трое сутак жанчыны правялі ў ІЧУ.
Праз 72 гадзіны жанчын адпусьцілі, але Натальля Тарабука не змагла трапіць на ўласны суд, бо апынулася ў шпіталі. Суд некалькі разоў пераносілі, апошняя прызначаная дата — 13 траўня. Натальлю Тарабуку таксама вінавацяць у распаўсюдзе так званых экстрэмісцкіх матэрыялаў.
Асудзіць маюць яшчэ загадчыцу катэдры канструяваньня і тэхналёгіі адзеньня і абутку, кандыдатку тэхнічных навук Натальлю Бадзялу і загадчыцу катэдры эканамічнай тэорыі і маркетынгу доктарку тэхнічных навук Галіну Яшаву.
Верхнядзьвінскую актывістку Валянціну Болбат адправілі за краты на 30 сутак
Валянціну затрымалі 30 красавіка, але пасьля гэтага жанчыне стала дрэнна, таму яна на некаторы час трапіла ў бальніцу, паведамляе «Вясна».
Днямі яна напісала ў фэйсбуку, што чакае суду паводле двух пратаколаў: па арт. 19.11 КаАП (распаўсюд экстрэмісцкіх матэрыялаў) і арт. 24.23 КаАП (несанкцыянаванае пікетаваньне). 12 траўня ейныя знаёмыя ў сацсетках паведамілі, што Болбат асудзілі да 30 сутак арышту. Вядома, што суд адбыўся 10 траўня ў судзе Верхнядзьвінскага раёна.
Напрыканцы 2022 года жанчыну ўжо тройчы асудзілі паводле адміністрацыйных справаў. Таму яна таксама мусіць сплаціць 130 базавых велічыняў, а таксама сплаціць грошы за ўтрыманьне ў ЦІПе. Вядома, што жанчына спрабавала ўзяць крэдыт на гэта, але ёй адмовілі.
