Як паведамляе сайт «Салідарнасьць», напярэдадні гадавіны масавых затрыманьняў і арыштаў лідараў незалежных і свабодных прафсаюзаў Беларусі ў Аргентыне прайшла акцыя пратэсту, арганізаваная Сацыялістычным рухам працоўных (MST), Рабочым левым фронтам — Адзінства і Міжнароднай сацыялістычнай Лігай (LIS).
Дзясяткі ўдзельнікаў трымалі ў руках фатаздымкі, на якіх беларускія сілавікі б'юць мірных дэманстрантаў у жніўні 2020 год. Аргентынскія актывісты запатрабавалі ад уладаў Беларусі вызваліць прафсаюзных лідэраў, асуджаных за выказваньне сваёй грамадзянскай і прафсаюзнай пазыцыі.
Выступоўцы запэўнілі супрацоўнікаў амбасады, што злачынныя дзеяньні беларускага рэжыму не застануцца незаўважанымі.
