Дырэктар ЦРУ Уільям Бэрнз заявіў, што ваенная кампанія Расеі ва Ўкраіне стала для прэзыдэнта Расеі Ўладзіміра Пуціна «велізарным стратэгічным правалам» і што Масква можа неўзабаве стаць «эканамічнай калёніяй Кітаю», піша «Голас Амэрыкі».
«Толькі падумайце, які ўплыў на эканамічныя далягляды Расеі акажуць ня толькі страты ў жывой сіле і тэхніцы, але і прыніжэньне, якое адчула расейскае войска, выяўленьне яе слабасьцяў, доўгатэрміновая шкода ад санкцый і мер экспартнага кантролю, а таксама сыход больш як тысячы заходніх фірмаў», — заявіў Бэрнз, выступаючы ва Ўнівэрсытэце Райса ў Х’юстане.
«Падумайце, што ў пачатку вайны Пуцін меў намер раскалоць і аслабіць NATO, а на самой справе NATO зараз згуртаванае, як ніколі. Блёк толькі што прыняў у свае шэрагі новага сябра, Фінляндыю, і, хутчэй за ўсё, прыме яшчэ аднаго, Швэцыю», — сказаў ён.
На думку кіраўніка ЦРУ, Расея становіцца ўсё больш залежнай ад Кітаю, а ў некаторых адносінах «рызыкуе з часам стаць эканамічнай калёніяй Кітаю, залежнай ад экспарту энэргетычных рэсурсаў і сыравіны ў гэту краіну».
У канцы 2021 году прэзыдэнт ЗША Джо Байдэн адпраўляў Бэрнза ў Маскву, каб угаварыць Пуціна не пачынаць вайну, але кіраўнік ЦРУ вярнуўся зь перакананьнем, што прэзыдэнт Расеі ўжо прыняў рашэньне. На думку Бэрнса, Пуцін наўрад ці зробіць высновы са сваіх памылак, дапушчаных за апошнія 14 месяцаў.
«Ён ставіць на тое, што яму ўдасца перамалоць украінцаў і выматаць Захад. Ён думае і хоча, каб мы думалі, што ён можа прымусіць час працаваць на яго. Ён па-ранейшаму перакананы, што Ўкраіна важней для яго, чым для нас. Думаю, Пуцін таксама памыліўся ў гэтай стаўцы, як і ў сваіх здагадках перад уварваньнем».
У сакавіку старшыня КНР Сі Цзіньпін наведаў Маскву і падпісаў доўгатэрміновыя пагадненьні з Пуціным, якія даюць кітайскім фірмам непрапарцыйна вялікі доступ на рынак у такіх сэктарах, як фінансы, тэхналёгіі, сельская гаспадарка і космас, піша «Голас Амэрыкі».
Чакаецца, што гэтыя пагадненьні пашыраць выкарыстаньне Расеяй кітайскага юаню. Узамен, на думку назіральнікаў, Пуцін атрымаў патрэбную яму зараз выгаду, якая ўключае ў сябе ўплывовае палітычнае прыкрыцьцё з боку кітайскага калегі, які пазьбягае прамога асуджэньня расейскага ўварваньня.
«Думаю, партнэрства паміж Кітаем Сі Цзіньпіна і Расеяй Уладзіміра Пуціна сёньня вельмі моцнае», — сказаў Бэрнс.
Тым ня менш Пэкін пакуль устрымліваецца ад адпраўкі зброі Маскве для выкарыстаньня на полі бою.
«Гэта важнае партнэрства, якому, я думаю, адданыя абодва лідэры. Але ва ўсякім разе пакуль гэта не „бязьмежная“ дружба», — рэзюмаваў Бэрнз.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
