Вярхоўны суд 21 сакавіка разгледзеў апэляцыйныя скаргі вайсковага аглядальніка Ягора Лебядка і жонкі палітвязьня Ігара Лосіка Дар’і Лосік.
Скаргі пакінуты без задавальненьня. Прысуды, такім чынам, набылі моц.
У сьнежні мінулага году Ягор Лябядок атрымаў пакараньне ў 5 гадоў калёніі за інтэрвію незалежнаму СМІ, якое ўлады прызналі «экстрэмісцкім».
У студзені сёлета Дар’ю Лосік асудзілі на 2 гады калёніі паводле артыкулу за садзейнічаньне экстрэмісцкай дзейнасьці (ч. 1 арт. 361-4 КК). Так яе вырашылі пакараць за інтэрвію рэдакцыі, якую МУС Беларусі прызнаў «экстрэмісцкім фармаваньнем».
Раней паведамлялася аб праблемах зь ліставаньнем палітзьняволеных сужэнцаў Ігара і Дар'і Лосікаў.
