Аляксандар Лукашэнка 10 сакавіка падпісаў указ № 66 «Аб прызыве афіцэраў запасу на вайсковую службу», паведаміла ягоная прэсавая служба.
Указам прадугледжана прызваць у 2023 годзе ва Ўзброеныя Сілы да 230 грамадзян мужчынскага полу ва ўзросьце да 27 гадоў і ў органы памежнай службы — да 20 чалавек, якія прайшлі навучаньне па праграмах падрыхтоўкі афіцэраў запасу на вайсковых катэдрах або факультэтах і маюць воінскае званьне афіцэраў.
Паводле прэсавай службы Лукашэнкі, рэалізацыя ўказу «дасьць магчымасьць павысіць узровень укамплектаванасьці першасных воінскіх пасад афіцэрскага складу ва Ўзброеных Сілах, забясьпечыць якасную падрыхтоўку мабілізацыйнай рэзэрвы».
Мінабароны Беларусі шмат разоў абвяргала зьвесткі пра магчымую мабілізацыю ў сувязі з вайной Расеі ва Ўкраіне, заяўляючы, што беларускія ваенкаматы праводзяць толькі плянавыя праверкі сьпісаў прызыўнікоў.
Кіраўніцтва Беларусі падтрымала агрэсію Расеі супраць Украіны і дазволіла скарыстаць вайсковую інфраструктуру і паветраную прастору для ўварваньня расейскай арміі і абстрэлаў мірных гарадоў Украіны, ахвярамі якіх сталі дзясяткі тысяч цывільных украінцаў.
Расейскія вайскоўцы праходзяць у Беларусі навучаньне на палігонах перад адпраўкай на вайну з Украінай. З 25 лютага зь Беларусі на акупаваную Расеяй частку ўкраінскага Данбасу адправілі 5 эшалёнаў з расейскімі салдатамі і вайсковай тэхнікай.
Дапамога ўладаў Беларусі ў расейскай вайне супраць Украіны
Лукашэнка неаднаразова заяўляў, што Беларусь удзельнічае ў «спэцыяльнай ваеннай апэрацыі» ва Ўкраіне, усяляк падтрымліваючы Расею, але «нікога не забіваючы».
«Спэцыяльнай ваеннай апэрацыяй» расейскае, а ўсьлед за ім і беларускае кіраўніцтва называе поўнамаштабную вайну супраць Украіны, якую Расея пачала 24 лютага 2022 году. Разам з тым Лукашэнка часам называе разьвязаны Расеяй канфлікт і вайной.
Улады ў Менску адмаўляюць удзел беларускай арміі ў баявых дзеяньнях на баку Расеі, у той жа час тэрыторыя Беларусі з пачатку ўварваньня, а таксама ў асобныя пэрыяды пазьней актыўна выкарыстоўвалася расейскай арміяй для нанясеньня ўдараў па Ўкраіне.
Таксама ёсьць сьведчаньні, што Беларусь дапамагае Расеі зброяй: танкі і іншую бранятэхніку разам з боепрыпасамі актыўна вывозяць у Расею, хоць Мінабароны Беларусі сьцьвярджае, што тэхніку вывозяць на мадэрнізацыю.
У верасьні 2022 году беларускія ўлады абвясьцілі, што ў краіне створаць сумесную з Расеяй групоўку войскаў з прычыны «неабходнасьці супрацьстаяць агрэсіўным намерам NATO і забясьпечваць абараназдольнасьць». Неўзабаве пасьля гэтага ў Беларусь пачалі прыбываць эшалёны з расейскімі вайскоўцамі і тэхнікай, пераважна тэнтаванымі «КамАЗамі» для перавозкі салдат.
Паводле беларускага Міністэрства абароны, групоўка ўключае ў сябе да 9 тысяч расейскіх вайскоўцаў, а таксама да 170 танкаў, да 200 браняваных машын, да 100 гармат.
