Як паведамляе «Голас Амэрыкі», сустрэча адбудзецца роўна праз год пасьля пачатку расейскага ўварваньня ва Ўкраіну, заходнія лідэры плянуюць абвясьціць сёньня новыя санкцыі супраць тых, хто дапамагае расейскай ваеннай машыне.
Летась гэтая ж група лідараў сабралася на экстраннае пасяджэньне празь некалькі гадзін пасьля таго, як прэзыдэнт Расеі Ўладзімір Пуцін пачаў так званую «спэцыяльную ваенную апэрацыю» супраць Украіны – з мэтай увядзеньня першага раўнду санкцый супраць Масквы.
«Вялікая сямёрка» стала краевугольным каменем нашага рашучага і адзінага адказу Расеі, заявіла ў чацьвер афіцыйны прадстаўніца Белага дома Карын Жан-П'ер. Паводле яе, у пятніцу лідэры абмяркуюць працяг падтрымкі Ўкраіны і ўзмацненьне ціску на Расею ў сувязі зь яе агрэсіяй супраць суседняй краіны.
Са слоў Жан-Пʼер, санкцыі закрануць як фізычных, так і юрыдычных асоб, зьвязаных зь дзейнасьцю расейскіх банкаў, тэхналягічнага і абароннага сэктараў.
ЗША таксама абʼявяць аб новым пакеце дапамогі Ўкраіне, які будзе ўключаць у сябе падтрымку ў галіне эканомікі, бясьпекі і энэргетыкі, дадала яна.
Урад Аўстраліі абвясьціў у пятніцу, што адправіць ва Ўкраіну новую партыю бесьпілётнікаў і пра ўвядзеньне новых фінансавых санкцый супраць 90 расейскіх фізычных і 40 юрыдычных асоб.
«Мы па-ранейшаму падтрымліваем Украіну», – заявіў прэмʼер-міністар Энтані Альбанэзэ. – (Бесьпілётныя авіяцыйныя комплексы) забясьпечваюць выведку, назіраньне і рэкагнасцыроўку на полі бою за вайсковымі абʼектамі Ўкраіны».
Ён не ўдакладніў, колькі бесьпілётнікаў і якой мадэлі адправяць ва Ўкраіну.
Міністарка замежных спраў Аўстраліі Пэні Вонг заявіла тэлеканалу ABC, што будзе заклікаць Кітай прыняць меры па дээскаляцыі канфлікту.
Аўстралія, адзін з найбуйнейшых абаронных донараў Украіны па-за NATO, пастаўляе Кіеву гуманітарную дапамогу, боепрыпасы і вайсковую тэхніку. Акрамя таго, Канбэра забараніла экспарт у Расею гліназёму і алюмініевых рудаў, у тым ліку баксытаў.
З пачатку канфлікту Аўстралія аказала Ўкраіне падтрымку бясьпекі на суму каля 500 мільёнаў аўстралійскіх даляраў (340 мільёнаў даляраў ЗША). Аўстралійскія спэцыялісты былі накіраваныя ў Вялікую Брытанію для падрыхтоўкі там украінскіх вайскоўцаў. Таксама Канбэра ўвяла санкцыі ў дачыненьні да больш як 1000 расейскіх фізычных і юрыдычных асоб.
Галоўны сакратар кабінэта міністраў Японіі Хірокадзу Мацуно заявіў у пятніцу, што Японія як старшыня G7 хоча ўмацоўваць сувязі «Вялікай сямёркі» з Кіевам і ўмацоўваць супрацоўніцтва з Украінай.
У пятніцу ў Японіі пройдзе онлайн-саміт G7, на якім будуць абмяркоўвацца пытаньні, зьвязаныя з абаронай Украіны.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
