Міністэрства замежных спраў Беларусі закрые аддзяленьне пасольства Беларусі ў Расеі ў горадзе Санкт-Пецярбург. Гэта прадугледжана пастановай Савету міністраў № 145 ад 23 лютага, апублікаванай на Нацыянальным прававым інтэрнэт-партале.
Замест аддзяленьня пасольства адкрыюць генэральнае консульства Беларусі. Аддзяленьне павінна быць закрыта да 1 ліпеня бягучага году, і да гэтай жа даты трэба адкрыць генконсульства.
Дадатковага фінансаваньня на гэта не прадугледжана - МЗС павінна вырашыць усе пытаньні ў межах сродкаў, выдзеленых яму на адкрыцьцё і ўтрыманьне дыпляматычных прадстаўніцтваў за мяжой.
МЗС ужо доўга займаецца аптымізацыяй сеткі дыпляматычных прадстаўніцтваў Беларусі за мяжой. Лукашэнка патрабаваў закрыцьця пасольстваў у краінах, зь якімі ў апошнія гады значна зьнізіўся ўзровень адносін, у тым ліку гандлёва-эканамічных, і пераарыентацыі работы на больш пэрспэктыўныя для супрацоўніцтва напрамкі.
У 2020 годзе каля аддзяленьня беларуска амбасады ў Пецярбургу неаднаразова праходзілі акцыі салідарнасьці зь беларускім пратэстам.