«18 лютага расейскія акупацыйныя войскі выпусьцілі па Ўкраіне чатыры крылатыя ракеты „Калібр“ з акваторыі Чорнага мора. Дзьве ракеты зьнішчаныя сіламі і сродкамі супрацьпаветранай абароны», — гаворыцца ў паведамленьні ўкраінскіх вайскоўцаў.
Таксама, паводле зьвестак вайскоўцаў, Расея прымяніла і тактычную авіяцыю ў паветранай прасторы акупаваных тэрыторый.
Украінскія ўлады і СМІ не паведамляюць аб тым, ці патрапілі ракеты па ўкраінскіх аб’ектах, аднак паведамлялася пра выбухі ў Хмяльніцкім і «працу СПА» у Мікалаеўскай вобласьці.
Кіраўнік Хмяльніцкай абласной ваеннай адміністрацыі Сяргей Гамалій паведаміў, што ў абласным цэнтры падчас паветранай трывогі 18 лютага прагрымелі сама меней два выбухі. Пазьней мэр Хмяльніцкага Аляксандар Сімчышын паведаміў, што ў горадзе былі пашкоджаныя тры навучальныя ўстановы і каля 10 шматпавярховых жылых дамоў. Паводле яго, параненыя двое мірных жыхароў.
Кіраўнік Мікалаеўскай абласной адміністрацыі Віталь Кім выклаў у тэлеграме фота абломка адной з ракет, дапісаўшы, што хутчэй за ўсё гэта абломкі ўкраінскай ракеты СПА.
Па стане на раніцу ў Чорным моры ваенныя аналітыкі зафіксавалі 12 ракет «Калібр». Прадстаўнік ВСУ Натальля Гумянюк папярэджвала, што масіраваны ўдар зь іх дапамогай Расея можа ажыцьцявіць «у любы момант».
