Джо Байдэн нагадаў, што Ўкраіна змагла выбіць расейскія войскі з Кіеўскай вобласьці, Харкаўскай вобласьці і часткі Херсонскай вобласьці. Пры гэтым ён заявіў, што расейскі прэзыдэнт не дэманструе гатовасьці спыніць вайну.
«Украіна на кожным кроку разбурала чаканьні Расеі. Прэзыдэнт Зяленскі, вы ясна далі зразумець, што гатовыя дамагацца справядлівага міру. Мы таксама ведаем, што Пуцін ня мае намеру спыніць гэтую жорсткую вайну. І ЗША маюць намер даць мужнаму ўкраінскаму народу магчымасьць працягваць абараняць сваю краіну ад расейскай агрэсіі столькі, колькі спатрэбіцца», — сказаў ён.
Байдэн падзякаваў Кангрэсу за законапраект аб дзяржаўных выдатках, які прадугледжвае дадатковае фінансаваньне 45 мільярдаў даляраў на патрэбы Ўкраіны.
«Таксама я падпісваю законапраект аб абароне, які палегчыць Міністэрству абароны закуп важных боепрыпасаў і абаронных матэрыялаў для Ўкраіны», — адзначыў ён.
Перад гэтым прэзыдэнт ЗША ў сваёй прамове назваў супраціў Украіны расейскай агрэсіі «часткай чагосьці значна большага».
«Амэрыканцы ведаюць, што, калі мы будзем стаяць убаку ад гэтага нахабнага нападу на свабоду і дэмакратыю і ключавыя прынцыпы сувэрэнітэту і тэрытарыяльнай цэласьці, сьвет напэўна пабачыць горшыя наступствы», — сказаў Байдэн.
Выступаючы на брыфінгу, Уладзімір Зяленскі падсумаваў вынікі размовы з Джо Байдэнам.
«Галоўнае пытаньне ўсіх маіх сёньняшніх перамоваў — умацаваньне Ўкраіны, гэта наступны год, гэта рух да перамогі ў вайне за незалежнасьць. У нас ёсьць выдатныя навіны, зь якімі я вяртаюся дадому. Сёньня прэзыдэнт Байдэн анансаваў новы пакет вайсковай дапамогі Ўкраіне на суму каля двух мільярдаў даляраў. Самы моцны элемэнт гэтага пакета — комплекс Patriot. Тое, што істотна ўмацуе нашу абарону. Гэта важны крок у стварэньні эфэктыўнага паветранага шчыта для Ўкраіны», — сказаў ён на брыфінгу па выніках перамоваў з прэзыдэнтам ЗША Джо Байдэнам.
Уладзімір Зяленскі назваў прэзыдэнта Расеі Ўладзіміра Пуціна «чалавекам з хворым стаўленьнем да сьвету».
«У 2019 годзе ў нас была „нармандзкая сустрэча“. Тады мы накіравалі Пуціну максымум мэсыджаў, каб ні ў якім разе не было поўнамаштабнага ўварваньня, каб спыніць агрэсію, аднавіць нашу тэрытарыяльную цэласьць, каб знайсьці дыпляматычнае паразуменьне. Ён казаў, што гэтага ніколі ня будзе. Казаў усім. Ён усім хлусіў. Якія мэсыджы вы можаце яму накіраваць пасьля таго, як ён атруціў наша цывільнае жыцьцё і бачыць сябе, мяркуючы зь яго мэсыджаў... пасьля Ўкраіны ён кажа, што мы можам пайсьці далей, дзе раней была магутная прысутнасьць Савецкага Саюзу. Нашто чалавеку, я лічу, з хворым стаўленьнем да сьвету, абсалютна неадэкватным, нашто яму слаць мэсыджы?» — сказаў Зяленскі на брыфінгу пасьля перамоваў з Байдэнам.
Байдэн і Зяленскі правялі двухбаковую сустрэчу, якая доўжылася каля трох гадзін. Таксама чакаецца, што прэзыдэнт Украіны выступіць перад Кангрэсам ЗША. Візыт у Вашынгтон — першая замежная паездка Ўладзіміра Зяленскага з пачатку поўнамаштабнага расейскага ўварваньня ва Ўкраіну.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
